پرەمەر-مينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين ۇكىمەت باسشىسى ولجاس بەكتەنوۆتىڭ BI Group پەن BAZIS-A كومپانيالارىنا نەلىكتەن شۇيلىككەنىن ءتۇسىندىردى، دەپ حابارلايدى Dalanews.kz.
ونىڭ ايتۋىنشا، ەل اراسىندا “ءىرى كاسىپورىندارعا ەشكىم تيىسپەيدى، ال شاعىن جانە ورتا بيزنەسكە اۋىرتپالىق كوپ تۇسەدى” دەگەن پىكىر قالىپتاسقان. وسى تۇسىنىكتى جويۋ ماقساتىندا ۇكىمەت باسشىسى سالىقتىق باقىلاۋعا الىنعان كومپانيالاردىڭ قاتارىندا ءىرى قۇرىلىس كومپانيالارى دا بار ەكەنىن كورسەتۋ ءۇشىن ولاردىڭ اتىن اتاعان.
“بىزدە سالىقتان بوساتىلعان نەمەسە ەرەكشە مارتەبەگە يە كاسىپورىندار جوق. بارلىعى بىردەي زاڭعا باعىنادى. سوندىقتان پرەمەر-مينيستر BI Group پەن BAZIS-A-نى مىسال رەتىندە كەلتىردى. بۇل – سالىق ورگاندارىنىڭ كۇندەلىكتى جۇمىسىنىڭ ءبىر بولىگى عانا”، – دەدى جۇمانعارين.
ءمينيستردىڭ سوزىنشە، سالىق ورگاندارى ءىرى بيزنەس سۋبەكتىلەرىنە عانا ەمەس، بارلىق كاسىپكەرگە حابارلاما جىبەرىپ، تەكسەرىس جۇرگىزەدى.
“وتكەن جىلى سالىق كوميتەتى 400 مىڭنان استام حابارلاما تاراتقان. بۇل – ولاردىڭ تۇراقتى جۇمىسى. ءبىراق سوڭعى ۋاقىتتا ۇكىمەت سالىقتىق باقىلاۋدى كۇشەيتپەيدى، تابىس كوزدەرىن ىزدەمەيدى دەگەن سىن كوبەيىپ كەتتى. سول سەبەپتى وسى جولى كەيبىر مىسالداردى اشىپ كورسەتتىك. بۇعان بلوگەرلەرگە جىبەرىلگەن حابارلامالار دا كىرەدى. ءقازىردىڭ وزىندە 15 بلوگەر ءوز تابىسىن قايتا ەسەپتەپ، 75 ملن تەڭگە سالىق تولەگەن. قۇرىلىس سالاسىنداعى الپاۋىت كومپانيالارعا دا وسىنداي تالاپ قويىلىپ وتىر. بۇل – ءبىر عانا مىسال، سالىق ورگاندارى كوپتەگەن كاسىپكەرلىك نىساندارىمەن جۇمىس ىستەپ جاتىر”، – دەپ قوستى جۇمانعارين.
ەسكە سالايىق، 28 اقپاندا پرەمەر-مينيستر ولجاس بەكتەنوۆ ۆيسە-پرەمەر-ۇلتتىق ەكونوميكا ءمينيسترى سەرىك جۇمانعارينمەن جانە قارجى ءمينيسترى ءمادي تاكييەۆپەن بىرگە جۇمىس كەڭەسىن وتكىزدى.
كەڭەستە سالىق-بيۋدجەت رەفورماسى جانە سالىق تۇسىمدەرىن باقىلاۋدى كۇشەيتۋ ماسەلەلەرى قارالدى.
قارجى ءمينيسترى ءمادي تاكييەۆ جۇرگىزىلگەن تالداۋ شەڭبەرىندە سالىق تولەۋشىلەر شاعىن كاسىپكەرلىكتى قولداۋ جانە دامىتۋ ماقساتىندا بۇرىن ەنگىزىلگەن ارنايى سالىق رەجيمدەرىن (سرپ) پايدالانعانى انىقتالعانىن باياندادى.
"قارجى ءمينيسترىنىڭ اقپاراتىنان سالىق جۇكتەمەسىن وڭتايلاندىرۋدىڭ ءارتۇرلى سحەمالارىن قولدانا وتىرىپ، مىندەتىن ادال اتقارمايتىن كاسىپكەرلەر بارىن كورىپ وتىرمىز. ميللياردتاعان اينالىممەن ولار بيۋدجەتكە وزدەرىنىڭ تاپقان پايداسىنا مۇلدەم سايكەس كەلمەيتىن سومالاردى تولەيدى. بىزدە وسىنداي ءىرى كومپانيالاردىڭ تولىق ءتىزىمى بار. ول تىزىمدە BI Group، BAZIS جانە باسقا دا كوپتەگەن ءىرى قۇرىلىس كومپانياسى ءجۇر. ەكونوميكانىڭ باسقا سالالارىندا جۇمىس ىستەيتىن بەلگىلى ءارى تانىمال مەيرامحانالار، فيتنەس-كلۋبتار جانە ءارتۇرلى كومپانيالار بار. وسى مۇمكىندىكتى پايدالانا وتىرىپ، ءقازىر سالىق جۇكتەمەسىن وڭتايلاندىرۋدىڭ ءتۇرلى سحەمالارىن قولداناتىن ءىرى كومپانيالاردىڭ يەلەرى مەن باسشىلارىنا قاراتا ايتقىم كەلەدى. بۇگىن-ەرتەڭ سىزدەردىڭ كومپانيالارىڭىزعا سالىق ورگاندارىنان قوسىمشا سالىق سومالارىن تولەۋ قاجەتتىلىگى تۋرالى حابارلامالار كەلىپ تۇسەدى"، - دەدى بەكتەنوۆ.
ولجاس بەكتەنوۆ كاسىپكەرلەردەن ەكى اپتا ىشىندە سالىق ورگاندارىنا قوسىمشا سالىق دەكلاراسيالارىن تاپسىرۋدى جانە شىنايى سالىق سوماسىن تولەۋدى سۇرادى.
