Qazaqstan premer-ministri Oljas Bektenov Memleket basshysy Qasym-Jomart Toqaevtyń sý tasqyny saldaryn joiý jáne qalpyna keltirý jumystarynyń barysy jónindegi tapsyrmalaryn oryndaýǵa qatysty keńes ótkizdi. Jetekshilik etetin baǵyttar boiynsha zardap shekken óńirlerdiń ákimderi men ministrlerdiń baiandamasy tyńdaldy, - dep habarlaidy Dalanews.kz.
Elimiz sý tasqynynyń qaýipti kezeńinen ótti. Qazirgi sátte Atyraý oblysynda Jaiyq ózenindegi sýdyń qaýipti deńgeiiniń saqtalýyna bailanysty sý tasqynyna qarsy jumystar jalǵasyp jatyr. Osyǵan bailanysty, Atyraý oblysynyń ákimi Serik Shápkenov sý tasqynyna qarsy is-sharalardy iske asyrý jalǵasyp jatqan óńirdegi ahýal týraly baiandady. Jaǵalaýlardy nyǵaitý bógetteriniń boiynda (uzyndyǵy 520 km-den astam) táýlik boiy kezekshilik uiymdastyryldy.
Bul rette, Atyraý oblysynyń sý tasqyny jaǵdaiy turaqty aýdandarynda zardaptardy joiý jónindegi komissiialar belsendi jumys isteýde. Máselen, Jylyoi aýdanynda 3 730 ótinish berýshi turǵynǵa jalpy somasy 1,3 mlrd teńgege 100 AEK mólsherinde birjolǵy járdemaqy tólendi. Komissiia 2 727 ótinishti qabyldap, 2 671 úige tehnikalyq tekserý jáne 2 624 úige baǵalaý júrgizgen. 10 turǵyn úidiń qurylysy bastalyp, 14 turǵyn jóndeý-qalpyna keltirý jumystaryna tólem aldy. Baǵalaýshy mamandar táýlik boiy jumys istep jatyr.
Jalpy, Qazaqstannyń sý tasqynynan zardap shekken óńirlerinde 60 myńnan astam adam óz úilerine oraldy. Evakýatsiialyq pýnktterdegi turǵyndarǵa jergilikti atqarýshy organdar qajetti kómek kórsetýde.
26 651 otbasy 10 mlrd teńgeden astam somaǵa 100 AEK mólsherinde birjolǵy tólem aldy.
Jergilikti ákimdikter zardap shekken turǵyndardy sapaly turǵyn úimen qamtamasyz etý boiynsha jumys júrgizip keledi. 239 otbasy qiraǵan baspanalarynyń ornyna páterler men úilerge ie boldy. Aqtóbe, Batys Qazaqstan, Qostanai, Atyraý, Soltústik Qazaqstan, Pavlodar oblystarynda zardap shekken azamattarǵa arnalǵan 794 jańa úidiń qurylysy júrgizilýde. Sonymen qatar 891 otbasy turǵyn úiin jóndeýge jáne qalpyna keltirý úshin ótemaqy aldy. Jalpy zardap shekken óńirlerde 11 137 turǵyn úi tekserilip, 7 863 nysanǵa baǵalaý jumysy jasaldy.
Aita ketý kerek, sýǵa ketken maldyń ótemi úshin memlekettik kómek kólemi 1,3 mlrd teńgeden asty.
Úkimet basshysy jumys qarqynyna basa nazar aýdardy.
«Baǵalaý, zalaldy óteý, qalpyna keltirý jáne qurylys júrgizý úshin aýqymdy jumys kútip tur. Biz qazirgi kezeńde jumys qarqynyn kórip otyrmyz, biraq keltirilgen zalaldy baǵalaý satysynda keshigý bar. Tótenshe jaǵdaida barlyq protsesterdi jedeldetý kerek. Baǵalaýshy mamandardy shyǵyndy esepteý aiaqtalǵan óńirlerden Atyraý jáne basqa da oblystarǵa jedel baǵyttaý qajet», - dep atap kórsetken Oljas Bektenov barynsha qysqa merzimde baǵalaýdy sapaly júrgizýdi tapsyrdy.
Jergilikti ákimdikterge kelgen mamandarǵa kómek kórsetýdi júktedi.
