Jetisý oblysynyń ákimi Beibit Isabaev búgin Taldyqorǵan qalasyndaǵy joldardy jóndeý jáne abattandyrý jumystarynyń barysyn tekserdi. Óńir basshysynyń aitýynsha, biyl oblys ortalyǵyndaǵy negizgi 11 kóshege jóndeý jumystary júrgiziledi, dep habarlaidy dalanews.kz.
Qalany aralaý barysynda oblys ákimi Shevchenko, Eskeldi bi jáne Dairov kóshelerindegi jóndeý jumystarynyń barysymen tanysty. Jóndelip jatqan ýchaskelerdiń jalpy uzyndyǵy 6,5 shaqyrym. Shevchenko kóshesindegi jóndeý jumystary kelesi aptada aiaqtalady dep josparlansa, barlyq jobany tolyq iske asyrý maýsym aiynyń sońyna deiin bitedi dep kútilip otyr.
– Biyl Taldyqorǵan qalasyndaǵy barlyq negizgi kóshelerdiń jóndeý jumystaryn aiaqtaimyz. Nazarbaev dańǵylyndaǵy jumystardyń basym bóligi atqaryldy. Qabanbai batyr kóshesi ótken jyly tolyq retke keltirildi. Jansúgirov kóshesindegi jóndeý biyl aiaqtalady. Sonymen qatar Eskeldi bi kóshesinen Gagarin kóshesine deiingi kóldeneń kósheler de osy jyly jóndeledi. Sondai-aq áýejaiǵa deiingi ainalma joldyń qurylysyn bitiremiz. Kelesi jyly qalanyń kireberis arkasynan ortalyq bassein mańyndaǵy ainalma jolǵa deiingi ýchaske jóndeledi. Budan bólek, qalǵan shaǵyn jol bólikteri de kezeń-kezeńimen qalpyna keltiriledi. Osylaisha, kelesi jyly oblys ortalyǵyndaǵy joldardy jóndeý máselesi tolyq sheshiledi, – dep atap ótti Beibit Isabaev.
Abylai han kóshesindegi ortasha jóndeý jumystaryna da erekshe nazar aýdaryldy. Qazir nysanda 20 arnaiy tehnika men 30 jumysshy eńbek etýde.
– Jóndeý jumystary bir jarym ai buryn, sáýir aiynda bastaldy. Jóndelip jatqan jol ýchaskesiniń uzyndyǵy – 1 shaqyrym 720 metr. Ol Táýelsizdik dańǵylynan Tynyshpaev kóshesine deiingi aralyqty qamtidy. Joba aiasynda jol jiegine jiektastar qoiylyp, jaiaý júrginshiler joldary abattandyryldy. Qazirgi kezde negizgi jumystardyń basym bóligi aiaqtaldy. Endi osy aptanyń sońyna deiin asfalt tósep bolamyz dep josparlap otyrmyz, – dedi oblys ákimine jumys barysyn baiandaǵan merdiger kompaniia direktorynyń orynbasary Ádilet Ádilǵazin.
Jóndelip jatqan kóshelerdiń turǵyndary atqarylǵan jumystardyń sapasyna oń baǵa berdi. Olardyń qatarynda jergilikti kásipkerler de bar. Turǵyndardyń aitýynsha, jol infraqurylymyn jańartý avtokólik júrgizýshileri men jaiaý júrginshilerge ǵana emes, shaǵyn biznestiń damýyna da qolaily jaǵdai jasap otyr.
– Bizdiń dúkenimiz Shevchenko kóshesinde ornalasqan. Joldyń jóndelip, keńeitilýiniń arqasynda kásipkerlerge de, tutynýshylarǵa da qolaily jaǵdai jasaldy. Dairov kóshesinde ornalasqan áriptesterim de dán riza. Óitkeni bul kóshede buryn-sońdy aýqymdy jóndeý jumystary júrgizilmegen edi. Jalpy, qala ortalyǵynda, bazar mańynda kólik qozǵalysy, kirip-shyǵý jáne avtoturaq máseleleri qiyn bolatyn. Qazir bul túitkilder sheshimin taýyp keledi. Soǵan rizamyz, – dep pikirin bildirdi jergilikti turǵyn.
Beibit Isabaev jol jóndeý jumystarynyń sapasy men qarqyny, qurylys tehnologiialarynyń saqtalýy men paidalanylatyn materialdardyń beriktigi turaqty baqylaýda bolýy tiis ekenin erekshe atap ótti.
Jalpy, biyl Taldyqorǵan qalasynda jalpy uzyndyǵy shamamen 30 shaqyrymdy quraityn 21 kóshe men saiajai alqaptarynyń joldaryna ortasha jóndeý jumystary júrgizilýde.
