15 jáne 16 qazanda Almatyda BE WOMAN ASIA 2026 halyqaralyq forýmy ótedi. Biylǵy jiynǵa 25 elden ǵylym, tehnologiia, kásipkerlik jáne mádeniet salalarynyń ókilderi qatysady. Forýmnyń negizgi taqyryby - "Etika kúshi", dep habarlaidy dalanews.kz.
Eki kúndik basqosýda jasandy intellekt dáýirindegi adamnyń jaýapkershiligi, jańa tehnologiialardyń qoǵamǵa áseri jáne Ortalyq Aziianyń álemdik úderisterdegi róli talqylanady.
Jasandy intellekt sheshim qabyldasa, jaýapkershilik kimge júkteledi?
Jasandy intellekt búginde adamnyń kúndelikti ómirine ǵana emes, mańyzdy sheshimderdiń qabyldanýyna da yqpal etip otyr. Osyǵan bailanysty forýmda tehnologiia usynǵan sheshimniń saldaryna kim jaýap beretini sóz bolady.
Bul máselege tehnologiialyq jobalardy ázirlegen, halyqaralyq kompaniialar qurǵan jáne túrli salalardaǵy ózgeristerge tikelei aralasqan sarapshylar óz tájiribesi negizinde jaýap izdeidi.
"BE WOMAN ASIA Ortalyq Aziianyń jahandyq úderisterdi syrttai baqylaýshy ǵana emes, onyń belsendi qatysýshysy ekenin kórsetetin alań. Jasandy intellekt dáýirinde kúsh yqpalmen emes, jaýapkershilikpen ólshenedi. Bizdiń forým dál osy týraly", - dedi BE WOMAN ASIA negizin qalaýshy Janna Kan.
Halyqaralyq sarapshylar Almatyǵa keledi
Forýmnyń halyqaralyq spikerleri qatarynda Facebook Live jobasyn jasaýshylardyń biri, Zuckerberg Media kompaniiasynyń negizin qalaýshy Rendi Tsýkerberg bar. Sondai-aq alǵashqy grafikalyq internet braýzerleriniń biri sanalatyn Mosaic jobasyn ázirleýge qatysqan kásipker Pin Fý sóz sóileidi.
Bul qatarda "Oskar" syilyǵynyń eki dúrkin iegeri, rejisser Sharmin Obeid-Chinoi, britandyq parfiýmer ári Jo Loves brendiniń negizin qalaýshy Djo Meloýn da keledi.
Budan bólek, jasandy intellekt salasyndaǵy saiasat pen retteý máseleleri jónindegi sarapshy Titi Akinsanmi, Women in Tech Global uiymynyń negizin qalaýshy Aiými Mýr Aoki jáne G20 EMPOWER bastamasynyń Frantsiiadaǵy ókili Kiara Koratstsa forýmǵa qatysady.
Olardyń kásibi tájiribesi internettiń qalyptasý kezeńinen bastap qazirgi jasandy intellekt dáýirine deiingi tehnologiialyq jáne qoǵamdyq ózgeristerdi qamtidy.
Ortalyq Aziia ókilderi qandai taqyryptardy qozǵaidy?
Forýmda Ortalyq Aziiadaǵy ǵylym, densaýlyq saqtaý, bilim berý, sán indýstriiasy jáne adam quqyqtary salalarynyń ókilderi de óz jobalaryn tanystyrady.
Spikerler qatarynda ǵaryshqa ushqan tuńǵysh qazaqstandyq áiel Danna Qaraǵusova, Ulttyq ǵylym akademiiasynyń akademigi, onkologiia salasynyń sarapshysy Diliara Qaidarova jáne múgedektigi bar adamdardyń quqyqtaryn halyqaralyq deńgeide qorǵap júrgen qoǵam qairatkeri Lázzat Qaltaeva bar.
Sonymen birge Ferragamo sán úiiniń aǵa dizaineri Abzal Isabekov pen Garvard ýniversitetiniń túlegi, bilim berý salasyndaǵy EdTech platformasynyń negizin qalaýshy Ásel Amangeldi sóz sóileidi.
Óńirlik spikerler qatarynda Ózbekstannan Shohida Ibragimova, Tájikstannan Nafisa Imranova jáne Qyrǵyzstannan Erke Jumaqmatova bar.
Negizgi baǵdarlamaǵa 3 myńnan astam adam qatysady
Forýmnyń negizgi baǵdarlamasy 15 qazanda Respýblika saraiynda ótedi. Uiymdastyrýshylardyń málimetinshe, sharaǵa oflain formatta 3 myńnan astam adam qatysady.
Kelesi kúni baǵdarlama tájiribelik sabaqtarmen, mentorlarmen kezdesýlermen jáne dóńgelek ústeldermen jalǵasady.
Basqosýda jasandy intellekt, kóshbasshylyq, bilim berý, densaýlyq saqtaý, kásipkerlik, mádeniet jáne inkliýziia máseleleri qamtylady. Uiymdastyrýshylardyń aitýynsha, buǵan deiin ártúrli alańdarda jeke qarastyrylyp kelgen bul baǵyttar forým aiasynda ózara bailanysty taqyryptar retinde talqylanady.
Forým aiasynda tórt áleýmettik joba júzege asyrylady
Biyl BE WOMAN ASIA tórt áleýmettik bastamany qatar damytyp keledi.
AMAN BOL jobasy Women in Tech Kazakhstan uiymymen birlesip júzege asyrylyp, áielderdiń tsifrlyq qaýipsizdigin qamtamasyz etýge baǵyttalǵan.
BE WOMAN × HR Capital baǵdarlamasy áiel kásipkerlerge bilim berý granttaryn usynady. Onyń alǵashqy kezeńine 18 qatysýshy qabyldanǵan.
Hidden Shero halyqaralyq jobasy qoǵam damýyna úles qosqan áielderdiń ómir joly men eńbegin tanystyrýdy kózdeidi.
Al Female Founders baǵdarlamasy startap qurǵan áielderdi qoldaýǵa arnalǵan. Joba aiasynda 20 startap investorlar aldynda ótetin pitch-sessiiaǵa qatysady.
BE WOMAN ASIA týraly
BE WOMAN ASIA platformasy kásipkerlik, memlekettik basqarý, ǵylym, mádeniet jáne qoǵamdyq bastamalar salalaryndaǵy mamandardy biriktiredi.
Uiymdastyrýshylardyń málimetinshe, joba 2024 jyly iske qosylǵannan beri onyń onlain jáne oflain is-sharalaryna 15 myńǵa jýyq adam qatysqan. Platforma 230-dan astam halyqaralyq spiker men mentordyń jáne biznes qaýymdastyǵyndaǵy 320 kóshbasshynyń basyn qosqan.
Ár jyldary forým jumysyna UNESCO, UNICEF, UN Women, Dúniejúzilik bank, EQYU, Garvard jáne Diýk ýniversitetteriniń ókilderi qatysqan. Platformanyń is-sharalary Qazaqstanmen qatar Ózbekstan, Qyrǵyzstan jáne Tájikstanda uiymdastyrylyp keledi. Negizgi forým jyl saiyn Almatyda ótedi.
