15 және 16 қазанда Алматыда BE WOMAN ASIA 2026 халықаралық форумы өтеді. Биылғы жиынға 25 елден ғылым, технология, кәсіпкерлік және мәдениет салаларының өкілдері қатысады. Форумның негізгі тақырыбы - "Этика күші", деп хабарлайды dalanews.kz.
Екі күндік басқосуда жасанды интеллект дәуіріндегі адамның жауапкершілігі, жаңа технологиялардың қоғамға әсері және Орталық Азияның әлемдік үдерістердегі рөлі талқыланады.
Жасанды интеллект шешім қабылдаса, жауапкершілік кімге жүктеледі?
Жасанды интеллект бүгінде адамның күнделікті өміріне ғана емес, маңызды шешімдердің қабылдануына да ықпал етіп отыр. Осыған байланысты форумда технология ұсынған шешімнің салдарына кім жауап беретіні сөз болады.
Бұл мәселеге технологиялық жобаларды әзірлеген, халықаралық компаниялар құрған және түрлі салалардағы өзгерістерге тікелей араласқан сарапшылар өз тәжірибесі негізінде жауап іздейді.
"BE WOMAN ASIA Орталық Азияның жаһандық үдерістерді сырттай бақылаушы ғана емес, оның белсенді қатысушысы екенін көрсететін алаң. Жасанды интеллект дәуірінде күш ықпалмен емес, жауапкершілікпен өлшенеді. Біздің форум дәл осы туралы", - деді BE WOMAN ASIA негізін қалаушы Жанна Кан.
Халықаралық сарапшылар Алматыға келеді
Форумның халықаралық спикерлері қатарында Facebook Live жобасын жасаушылардың бірі, Zuckerberg Media компаниясының негізін қалаушы Рэнди Цукерберг бар. Сондай-ақ алғашқы графикалық интернет браузерлерінің бірі саналатын Mosaic жобасын әзірлеуге қатысқан кәсіпкер Пин Фу сөз сөйлейді.
Бұл қатарда "Оскар" сыйлығының екі дүркін иегері, режиссер Шармин Обейд-Чиной, британдық парфюмер әрі Jo Loves брендінің негізін қалаушы Джо Мэлоун да келеді.
Бұдан бөлек, жасанды интеллект саласындағы саясат пен реттеу мәселелері жөніндегі сарапшы Тити Акинсанми, Women in Tech Global ұйымының негізін қалаушы Аюми Мур Аоки және G20 EMPOWER бастамасының Франциядағы өкілі Кьяра Корацца форумға қатысады.
Олардың кәсіби тәжірибесі интернеттің қалыптасу кезеңінен бастап қазіргі жасанды интеллект дәуіріне дейінгі технологиялық және қоғамдық өзгерістерді қамтиды.
Орталық Азия өкілдері қандай тақырыптарды қозғайды?
Форумда Орталық Азиядағы ғылым, денсаулық сақтау, білім беру, сән индустриясы және адам құқықтары салаларының өкілдері де өз жобаларын таныстырады.
Спикерлер қатарында ғарышқа ұшқан тұңғыш қазақстандық әйел Данна Қарағұсова, Ұлттық ғылым академиясының академигі, онкология саласының сарапшысы Диляра Қайдарова және мүгедектігі бар адамдардың құқықтарын халықаралық деңгейде қорғап жүрген қоғам қайраткері Ләззат Қалтаева бар.
Сонымен бірге Ferragamo сән үйінің аға дизайнері Абзал Исабеков пен Гарвард университетінің түлегі, білім беру саласындағы EdTech платформасының негізін қалаушы Әсел Амангелді сөз сөйлейді.
Өңірлік спикерлер қатарында Өзбекстаннан Шохида Ибрагимова, Тәжікстаннан Нафиса Имранова және Қырғызстаннан Эрке Жұмақматова бар.
Негізгі бағдарламаға 3 мыңнан астам адам қатысады
Форумның негізгі бағдарламасы 15 қазанда Республика сарайында өтеді. Ұйымдастырушылардың мәліметінше, шараға офлайн форматта 3 мыңнан астам адам қатысады.
Келесі күні бағдарлама тәжірибелік сабақтармен, менторлармен кездесулермен және дөңгелек үстелдермен жалғасады.
Басқосуда жасанды интеллект, көшбасшылық, білім беру, денсаулық сақтау, кәсіпкерлік, мәдениет және инклюзия мәселелері қамтылады. Ұйымдастырушылардың айтуынша, бұған дейін әртүрлі алаңдарда жеке қарастырылып келген бұл бағыттар форум аясында өзара байланысты тақырыптар ретінде талқыланады.
Форум аясында төрт әлеуметтік жоба жүзеге асырылады
Биыл BE WOMAN ASIA төрт әлеуметтік бастаманы қатар дамытып келеді.
AMAN BOL жобасы Women in Tech Kazakhstan ұйымымен бірлесіп жүзеге асырылып, әйелдердің цифрлық қауіпсіздігін қамтамасыз етуге бағытталған.
BE WOMAN × HR Capital бағдарламасы әйел кәсіпкерлерге білім беру гранттарын ұсынады. Оның алғашқы кезеңіне 18 қатысушы қабылданған.
Hidden Shero халықаралық жобасы қоғам дамуына үлес қосқан әйелдердің өмір жолы мен еңбегін таныстыруды көздейді.
Ал Female Founders бағдарламасы стартап құрған әйелдерді қолдауға арналған. Жоба аясында 20 стартап инвесторлар алдында өтетін питч-сессияға қатысады.
BE WOMAN ASIA туралы
BE WOMAN ASIA платформасы кәсіпкерлік, мемлекеттік басқару, ғылым, мәдениет және қоғамдық бастамалар салаларындағы мамандарды біріктіреді.
Ұйымдастырушылардың мәліметінше, жоба 2024 жылы іске қосылғаннан бері оның онлайн және офлайн іс-шараларына 15 мыңға жуық адам қатысқан. Платформа 230-дан астам халықаралық спикер мен ментордың және бизнес қауымдастығындағы 320 көшбасшының басын қосқан.
Әр жылдары форум жұмысына UNESCO, UNICEF, UN Women, Дүниежүзілік банк, ЕҚЫҰ, Гарвард және Дьюк университеттерінің өкілдері қатысқан. Платформаның іс-шаралары Қазақстанмен қатар Өзбекстан, Қырғызстан және Тәжікстанда ұйымдастырылып келеді. Негізгі форум жыл сайын Алматыда өтеді.
