Atyraý oblysy Jylyoi aýdanynda sý tasqynynyń beti qaitpai tur. Qaýip tónip turǵan aýmaqtan turǵyndar evakýatsiialyq pýnktterge kóshirilip jatyr.
Dalanews.kz aýdan turǵyndarynan qazirgi jaǵdai týraly surady.
Tótenshe jaǵdailar ministrliginiń keiingi aqparatyna súiensek, avtobýs turǵyndardy 10 evakýatsiialyq pýnktke evakýatsiialap jatyr. Qazirgi ýaqytta 130 adam evakýatsiialanǵan, onyń ishinde 84 bala bar.
Qulsary qalasynyń stantsiiasynan Atyraý qalasyna 5 vagonnan turatyn jolaýshylar poiyzy halyqty tegin tasymaldap jatyr. Óitkeni Jylyoi aýdanynda Jadyrasyn, Bolashaq, Qaraǵai yqshamaýdandaryn sý basyp jatyr.
Al Qulsary turǵynynyń sózinshe, qalanyń ortalyǵyna, bazarǵa, qala ákimdigine de sý kirgen.
"Qazir sý basqan aýyldardaǵy turǵyndardy qaýipsiz jerde turǵan mektepterge evakýatsiia jasap jatyr. Jalpy Jylyoi aýdany boiynsha 4 sáýir kúni tótenshe jaǵdai jariialanyp, 5 sáýir kúni sirena iske qosyldy. Ákimdik qolynan kelgenderin jasady, árine. Olardy da kinálaýǵa bolmas. Dese de sýdyń qarqyny qatty, aǵysy kúshti.
Sý bulai qatty keledi dep oilamaǵan edik. Jyldaǵy, kóktemdegi qardyń erigen sýy dep júr edik, biraq tasqyn sý tolastap kelip, ákimdik tótenshe jaǵdai jariialaǵanda ǵana jinaqtalyp, esimizdi jidyq. Qazirgi tańda qalada kóp úidi topan sý basty. Turǵyndar kóz aldynda úi sýǵa ketkende eriksiz jylap jatyr.
Qalanyń bárin sý basyp jatyr. Ortalyq, bazar, kalalyq ákimdik, jeke kásipkerlik oryndar, meiramhanalar, mektepterge de sý kirdi", - deidi ol.
TJD málimetinshe, jaǵalaýdy nyǵaitý jumystary táýlik boiy júrgizilip jatyr. Jumystarǵa JAO, politsiia, áskeri bólimniń, TJD 323 qyzmetkeri, 142 tehnikasy, eriktiler men jergilikti turǵyndar arasynan 4540 adam jumyldyrylǵan.
Alaida sý tasqynynan zardap shekkender qatary saǵat saiyn artyp barady. Biri týystarynyń úiin jaǵalasa, biri aýyl mektepterin panalap jatyr. Turǵyndar uialy bailanys sapasy da nasharlaǵanyn aitady.
Al 4 sáýirde saǵat 09:50 shamasynda A-33 Dossor-Qulsary tasjolynyń 101-shaqyrymynda Jem ózeniniń arnasynan sý tasyp, joldy sý alyp ótken edi.
"Qazir erigen qar sýyn aǵyzý boiynsha jumystar atqarylyp jatyr. 10 adam men 4 tehnika jumyldyryldy", - dep habarlady keshe QazAvtoJol.
Sonymen qatar, Dossor - Qulsary - Beineý - Saiótes - Shetpe - Jetibai - Aqtaý tasjolynyń 4-119 shaqyrymynda kólik quralynyń barlyq túri úshin qozǵalys shekteldi.
