اتىراۋ وبلىسى جىلىوي اۋدانىندا سۋ تاسقىنىنىڭ بەتى قايتپاي تۇر. ءقاۋىپ ءتونىپ تۇرعان اۋماقتان تۇرعىندار ەۆاكۋاسيالىق پۋنكتتەرگە كوشىرىلىپ جاتىر.
Dalanews.kz اۋدان تۇرعىندارىنان قازىرگى جاعداي تۋرالى سۇرادى.
توتەنشە جاعدايلار مينيسترلىگىنىڭ كەيىنگى اقپاراتىنا سۇيەنسەك، اۆتوبۋس تۇرعىنداردى 10 ەۆاكۋاسيالىق پۋنكتكە ەۆاكۋاسيالاپ جاتىر. قازىرگى ۋاقىتتا 130 ادام ەۆاكۋاسيالانعان، ونىڭ ىشىندە 84 بالا بار.
قۇلسارى قالاسىنىڭ ستانسياسىنان اتىراۋ قالاسىنا 5 ۆاگوننان تۇراتىن جولاۋشىلار پويىزى حالىقتى تەگىن تاسىمالداپ جاتىر. ويتكەنى جىلىوي اۋدانىندا جادىراسىن، بولاشاق، قاراعاي ىقشاماۋداندارىن سۋ باسىپ جاتىر.
ال قۇلسارى تۇرعىنىنىڭ سوزىنشە، قالانىڭ ورتالىعىنا، بازارعا، قالا اكىمدىگىنە دە سۋ كىرگەن.
"ءقازىر سۋ باسقان اۋىلدارداعى تۇرعىنداردى ءقاۋىپسىز جەردە تۇرعان مەكتەپتەرگە ەۆاكۋاسيا جاساپ جاتىر. جالپى جىلىوي اۋدانى بويىنشا 4 ءساۋىر كۇنى توتەنشە جاعداي جاريالانىپ، 5 ءساۋىر كۇنى سيرەنا ىسكە قوسىلدى. اكىمدىك قولىنان كەلگەندەرىن جاسادى، ارينە. ولاردى دا كىنالاۋعا بولماس. دەسە دە سۋدىڭ قارقىنى قاتتى، اعىسى كۇشتى.
سۋ بۇلاي قاتتى كەلەدى دەپ ويلاماعان ەدىك. جىلداعى، كوكتەمدەگى قاردىڭ ەرىگەن سۋى دەپ ءجۇر ەدىك، ءبىراق تاسقىن سۋ تولاستاپ كەلىپ، اكىمدىك توتەنشە جاعداي جاريالاعاندا عانا جيناقتالىپ، ەسىمىزدى جيدىق. قازىرگى تاڭدا قالادا كوپ ءۇيدى توپان سۋ باستى. تۇرعىندار كوز الدىندا ءۇي سۋعا كەتكەندە ەرىكسىز جىلاپ جاتىر.
قالانىڭ ءبارىن سۋ باسىپ جاتىر. ورتالىق، بازار، كالالىق اكىمدىك، جەكە كاسىپكەرلىك ورىندار، مەيرامحانالار، مەكتەپتەرگە دە سۋ كىردى"، - دەيدى ول.
تجد مالىمەتىنشە، جاعالاۋدى نىعايتۋ جۇمىستارى تاۋلىك بويى جۇرگىزىلىپ جاتىر. جۇمىستارعا جاو، پوليسيا، اسكەري ءبولىمنىڭ، تجد 323 قىزمەتكەرى، 142 تەحنيكاسى، ەرىكتىلەر مەن جەرگىلىكتى تۇرعىندار اراسىنان 4540 ادام جۇمىلدىرىلعان.
الايدا سۋ تاسقىنىنان زارداپ شەككەندەر قاتارى ساعات سايىن ارتىپ بارادى. ءبىرى تۋىستارىنىڭ ءۇيىن جاعالاسا، ءبىرى اۋىل مەكتەپتەرىن پانالاپ جاتىر. تۇرعىندار ۇيالى بايلانىس ساپاسى دا ناشارلاعانىن ايتادى.
ال 4 ساۋىردە ساعات 09:50 شاماسىندا ا-33 دوسسور-قۇلسارى تاسجولىنىڭ 101-شاقىرىمىندا جەم وزەنىنىڭ ارناسىنان سۋ تاسىپ، جولدى سۋ الىپ وتكەن ەدى.
"ءقازىر ەرىگەن قار سۋىن اعىزۋ بويىنشا جۇمىستار اتقارىلىپ جاتىر. 10 ادام مەن 4 تەحنيكا جۇمىلدىرىلدى"، - دەپ حابارلادى كەشە قازاۆتوجول.
سونىمەن قاتار، دوسسور - قۇلسارى - بەينەۋ - سايوتەس - شەتپە - جەتىباي - اقتاۋ تاسجولىنىڭ 4-119 شاقىرىمىندا كولىك قۇرالىنىڭ بارلىق ءتۇرى ءۇشىن قوزعالىس شەكتەلدى.
