Ol: «Meniń saparymnyń negizgi maqsaty – QHR Tóraǵasy Si Tszinpin men Sizdiń arańyzdaǵy mańyzdy strategiialyq kelisimderdi júzege asyrý. Qazaqstan – biz úshin ózara yntymaqtastyqtyń basym baǵyty», – degen edi.
Ma Shińjúi Qytai KP OK Saiasi biýrosynyń múshesi. Shyńjań-Uiǵyr avtonomiialyq aýdanynyń bastyǵy (QKP partiia komitetiniń hatshysy).
Ma Shińjúidiń negizgi mamandyǵy – aeroǵarysh ónerkásibi salasynyń injineri.
Shyńjańǵa 2021 jyly kelgen. Oǵan deiin uzaq jyl Qytaidyń ǵarysh salasyn basqarǵan. Qytai aeroǵarysh ǵylymi-tehnikalyq korporatsiiasyn, Qytai Ulttyq ǵaryshty basqarý agenttigin basqarǵan.
Qytaidyń alǵashqy aidy zertteý jobasyna (Chane-3) jetekshilik etken. Qytaidyń ǵarysh salasynda túrli laýazymdardy 1996 jyldan beri atqarǵan adam.
Shyndyǵynda, Qazaqstannyń darhan kóńil Úkimeti Baiqońyrdy 2025 jylǵa deiin Reseige jalǵa bergen edi. Al sońǵy jyldary Baiqońyrdaǵy Reseidiń yqpaly azaia bastaǵany baiqalady.
Zymyran ushyrý keshenderi az qoldanyla bastaǵan. Onyń ústine biyl Baiqońyrda Qazaqstan men Resei arasy ýshyǵa tústi. Qazaqstan Resei múlkin buǵattap, 2 mlrd rýbl talap etti, al Resei bolsa 220 mln dollardyń keri talabyn alǵa tartty.
Reseidiń impershil biliginiń Ýkrainaǵa qarsy agressiiasy álemdik saiasatta kóp ózgeris jasady. Sonyń yqpaly Baiqońyrda da ainalyp ótken joq. AQSh pen Batys bastaǵan órkenietti elder «Roskosmostan» teris ainaldy.
Al Resei 2028 jyldan keiin óziniń stantsiiasynan ushýdy kózdeidi. Biraq onysy áli daiyn emes. Resei óz jerine kóshkenniń ózinde, «Vostochnyiǵa» kóshedi. Ol úshin ǵarysh ailaǵyn «Soiýz» ushyrýǵa beiimdeý kerek. Jospar júzege assa, 2028 jyly Resei Baiqońyrdan túpkilikti ketedi.
Keshegi Ma Shińjúidiń Qazaqstanǵa kelýi beker emes. 5 jyl degenińiz áne-mine. Baiqońyrdan árkimniń bar talasy...
