Keshe eks-mınıstr Qýandyq Bıshimbaevqa qatysty sot otyrysynda Baýyrjan Mýsın esimdi adamnyń aty ataldy. Endi tergeý ızolátorynda qyzmettik tekseris júrgizilmek,- dep habarlaıdy Dalanews.kz.
İİM qylmystyq atqarý júıesi komıteti málimetinshe, Baqytjan Baıjanov ataǵan Baýyrjan Mýsın - "Biz azaptaýǵa qarsymyz" qoǵamdyq birlestiginiń múshesi.
"Bul uıym óz qyzmetin eki jaqty memorandým sheńberinde júzege asyrady. Óz kezeginde penıtensıarlyq mekemelerde adam quqyqtarynyń saqtalýyna monıtorıńti uıym músheleri jumys ýaqytynda mekeme qyzmetkerleriniń súıemeldeýimen júzege asyrady. Aıyptalýshy B. Baıjanov kórsetken faktiler boıynsha QAJ Astana qalasy boıynsha departamenti qyzmettik tekserý júrgizedi", – dep habarlady komıtet Ulys.media-ǵa.
Keshegi sot otyrysynda Baqytjan Baıjanov tergeý ızolátorynda onyń Bıshimbaevpen kezdesýin uıymdastyrǵan adam bolǵanyn málimdedi. Ol tergeý ızolátoryna Baýyrjan Mýsın esimdi adam kelgenin aıtty.
"Baýyrjan Mýsın maǵan tórt ret keldi. Meni kameradan shyǵaryp aldy. Oǵan barsam, janynda Bıshimbaev tur. Iaǵnı ol kezdeskisi kelgen. Men birden burylyp, ketip qaldym. Ákimshilikke maǵan jaqyndamasyn dedim, óıtkeni onyń maǵan kelýin suramadym. Meniń advokattarym da suramady. Ol sodan keıin de eki-úsh ret kelip, meni Saltanattyń otbasyna qarsy qoıýǵa tyrysty", - dep jaýap berdi Baıjanov.
BAQ-ta Baýyrjan Mýsın degen adamnyń esimi 2017, 2018 jyldary jıi jazylǵan. abai.kz málimetinshe, ol sol kezdegi QR Din isteri jáne azamattyq qoǵam mınıstrliginiń Azamattyq qoǵam isteri jónindegi komıteti tóraǵasynyń orynbasary boldy degen aqparat bar. Sonymen qatar, Mýsınniń 400 myń teńge paramen ustalyp, qamaýǵa alynǵany týraly da derekter bar.
"Jemqorlyqqa qarsy is-qımyl ulttyq búrosynyń Astana qalalyq departamenti QR Din isteri jáne azamattyq qoǵam mınıstrliginiń Azamattyq qoǵam isteri jónindegi komıteti tóraǵasynyń orynbasary B.Mýsınniń memlekettik satyp alýǵa qatysýshylar múddesin lobbıleý úshin júıeli túrde para alǵanyn anyqtady", - dep habarlady sol kezde Ulttyq búronyń baspasóz qyzmeti ókilderi.
abai.kz málimetine súıensek, B.Mýsın kásipkerden 400 myń teńge kólemindegi paranyń kezekti bóligin alý barysynda ustalǵan. Paranyń jalpy somasy 1,4 mıllıon teńge bolǵan. Keıin oǵan 7 jylǵa jaza taǵaıyndalǵan. Degenmen derekterde onyń da Bıshimbaev sekildi uzaq ýaqyt jazasyn ótep, túrmede otyrmaǵany aıtylady.
Sonymen qatar, orda.kz aqparatynda buǵan deıin Mýsın Aıtbek Amangeldige qarsy túrli jazbalar jazǵan degen de derekter bar. Iaǵnı marqum Núkenovanyń aǵasyn Bıshimbaevtyń balalaryna qatysty aıyptaǵan.
"Ol kishkentaı qyzdy shashynan ustap, úıde súıregen. Basqa balalar qatty qorqyp, bólmede jasyrynyp qalǵan, al ol Bıshimbaevqa qońyraý shalyp, zorlyq qoldanamyn dep aıǵaılaǵan", - dep keltirgen basylym.
Al áleýmettik jelide Baýyrjan Mýsın esimdi adamnyń jazbasy paıda boldy.
"Bıshimbaev isi boıynsha sotta aıyptalýshy Baıjanov meniń famılıamdy ataǵanyn estidim, oǵan elordanyń tergeý ızolátorynda qysym kórsetippin-mys.
Mundaı nárse eshqashan bolmaǵanyn resmı túrde málimdeımin jáne men oǵan eshqashan qysym jasaǵan emespin, olaı isteýdi de oılaǵan emespin! Astana qalasynyń tergeý ızolátoryndabeınebaqylaý kameralary men tergeý ızolátory qyzmetkerleri bar. Ol eshqashan oǵan qysymkórsetkenim nemese qorqytqanym nemese bireýdi qorlaǵanym týraly shaǵym túsirgen emes! Búginoǵan jala japqany úshin sotqa aryz beremin!" - dedi ol.
