Eks-ministr Qýandyq Bishimbaevqa qatysty sot otyrysy áli de jalǵasyp jatyr. Búgingi sot otyrysynda kezekti kýáger - oqiǵa bolǵan kúni Baijanov qońyraý shalǵan dáriger, - dep habarlaidy Dalanews.kz.
Qaiǵyly oqiǵa bolǵan kúni Baqytjan kómek surap, Ersultan esimdi dárigerge habarlasqan.
Ersultan Sársenbaev "Materinstvo detstva" ortalyǵynda dáriger bolyp jumys isteitinin jetkizdi. Al Baijanovpen tanystyǵy uzaqqa sozylmaǵan. 2023 jyly qazanda qosymsha tabys tabý úshin BAU meiramhanasynyń bir bóligin jalǵa alyp, kalian shegetin oryn ashqan eken. Olar sodan beri tanys.
9 qarasha qaiǵyly oqiǵa bolǵan kezde Baijanov onyń dáriger ekenin bilip, Saltanattyń jaǵdaiyn kórsin dep qońyraý shalǵan.
"Men jumysta bolǵandyqtan, “bara almaimyn, jedel járdem shaqyryńdar” dedim. Qazir jekemenshik jedel járdem qyzmeti de bar, "shamamen 40 myń teńge" dedim. Telefonmen konsýltatsiia bere almaimyn, onyń túrin, halin óz kózimmen kóre almaǵandyqtan, eshteńe aita almaimyn. Biraq maǵan tańǵa deiin ishimdik ishti, qazir uiyqtap jatyr, oianbai jatyr, bir kózi qyzarǵan dedi. Onyń túsindirýi boiynsha, bul – alkogoldi intoksikatsiia bop kórindi”, – dedi kýáger.
Ol 1 saǵattan keiin qaitadan Baijanovqa qońyraý soǵyp, jedel járdem shaqyrǵan-shaqyrmaǵanyn suraǵan. Olar áli shaqyrmaǵanyn aitypty.
"Jeńgesiniń bólmesine kire almaimyn dedi. Ol bólek kabinkada otyrǵanyn aitty", – dedi ol.
Aita keteiik, 27 naýryzda eks-ministr Qýandyq Bishimbaevtyń isi boiynsha alqabiler tańdalǵan edi. Alqabiler alqasyna 12 adam irikteldi: 10 – negizgi quram, 2 – qosalqy. Sodan keiin ashyq sot otyrystary bastaldy.
Sonymen qatar, Qýandyq Bishimbaev sotta Saltanat Núkenovany asa qatygezdikpen óltirgenin moiyndamady. Bul oqiǵa 2023 jyly 9 qarashada Astana qalasyndaǵy BAU meiramhanasynda boldy.
Sot otyrystarynda oqiǵa bolǵan kezdiń, dálirek, Bishimbaev Saltanatty shashynan súirep, tepkilegen sumdyq kadrlar kórsetildi.
Keiinirek sot otyrysynda Baijanov Bishimbaev sotqa ákele jatqan kezde jaýaptaryna áser etkisi kelgenin málimdedi.
"Bishimbaev "jedel járdemge birge habarlastyq dep ait" dedi. "Aitpasań, seniń basyńa kelsin, seniń balalaryńnyń basyna kelsin dep qarǵaimyn" dedi. Tergeý izoliatorynda anda-sanda (Bishimbaevpen - esk.) kezdesip júrdik. Sol kezde "nashatyr berip jatqanda, sen qarap turdym dep ait" (dedi - esk.). Biraq men syrtta qaldym", - dedi Baijanov.
Buǵan deiin Baqytjan Baijanov Bishimbaev tarapynan ózine qysym jasalyp jatqanyn aitty. Sonymen qatar, bólek otyrǵysy keletinin málimdedi.
"Bishimbaevtyń Baijanovqa sóileýge múmkindigi bolmasa eken. Baijanov ózine qysym kórsetilip jatyr dep sanaidy. Olardyń arasynda qaqtyǵys bolyp jatyr. Tym quryǵanda erteń (bólek otyrsa - esk.)", - dedi Baijanovtyń advokaty.
Muny Baijanovtyń ózi de rastady.
"Ol maǵan jaýap berý kezinde "bylai ait, bylai ait" dep qysym kórsetip jatyr", - dedi Baijanov.
Baqytjan Baijanovqa Qylmystyq kodekstiń eki baby boiynsha aityp taǵylyp otyr:
- 432-baby (asa aýyr qylmysty jasyryp qalý);
- 434-baby (asa aýyr qylmysty habarlamaý).
