ەكس-مينيستر قۋاندىق بيشىمبايەۆقا قاتىستى سوت وتىرىسى ءالى دە جالعاسىپ جاتىر. بۇگىنگى سوت وتىرىسىندا كەزەكتى كۋاگەر - وقيعا بولعان كۇنى بايجانوۆ قوڭىراۋ شالعان دارىگەر، - دەپ حابارلايدى Dalanews.kz.

قايعىلى وقيعا بولعان كۇنى باقىتجان كومەك سۇراپ، ەرسۇلتان ەسىمدى دارىگەرگە حابارلاسقان.

ەرسۇلتان سارسەنبايەۆ "ماتەرينستۆو دەتستۆا" ورتالىعىندا دارىگەر بولىپ جۇمىس ىستەيتىنىن جەتكىزدى. ال بايجانوۆپەن تانىستىعى ۇزاققا سوزىلماعان. 2023 جىلى قازاندا قوسىمشا تابىس تابۋ ءۇشىن BAU مەيرامحاناسىنىڭ ءبىر بولىگىن جالعا الىپ، كاليان شەگەتىن ورىن اشقان ەكەن. ولار سودان بەرى تانىس. 

9 قاراشا قايعىلى وقيعا بولعان كەزدە بايجانوۆ ونىڭ دارىگەر ەكەنىن ءبىلىپ، سالتاناتتىڭ جاعدايىن كورسىن دەپ قوڭىراۋ شالعان. 

"مەن جۇمىستا بولعاندىقتان، “بارا المايمىن، جەدەل جاردەم شاقىرىڭدار” دەدىم. ءقازىر جەكەمەنشىك جەدەل جاردەم قىزمەتى دە بار، "شامامەن 40 مىڭ تەڭگە" دەدىم. تەلەفونمەن كونسۋلتاسيا بەرە المايمىن، ونىڭ ءتۇرىن، ءحالىن ءوز كوزىممەن كورە الماعاندىقتان، ەشتەڭە ايتا المايمىن. ءبىراق ماعان تاڭعا دەيىن ىشىمدىك ءىشتى، ءقازىر ۇيىقتاپ جاتىر، ويانباي جاتىر، ءبىر كوزى قىزارعان دەدى. ونىڭ ءتۇسىندىرۋى بويىنشا، بۇل – الكوگولدى ينتوكسيكاسيا بوپ كورىندى”، – دەدى كۋاگەر.

ول 1 ساعاتتان كەيىن قايتادان بايجانوۆقا قوڭىراۋ سوعىپ، جەدەل جاردەم شاقىرعان-شاقىرماعانىن سۇراعان. ولار ءالى شاقىرماعانىن ايتىپتى.

"جەڭگەسىنىڭ بولمەسىنە كىرە المايمىن دەدى. ول بولەك كابينكادا وتىرعانىن ايتتى"، – دەدى ول.

ايتا كەتەيىك، 27 ناۋرىزدا ەكس-مينيستر قۋاندىق بيشىمبايەۆتىڭ ءىسى بويىنشا القابيلەر تاڭدالعان ەدى. القابيلەر القاسىنا 12 ادام ىرىكتەلدى: 10 – نەگىزگى قۇرام، 2 – قوسالقى. سودان كەيىن اشىق سوت وتىرىستارى باستالدى.

سونىمەن قاتار، قۋاندىق بيشىمبايەۆ سوتتا سالتانات نۇكەنوۆانى اسا قاتىگەزدىكپەن ولتىرگەنىن مويىندامادى. بۇل وقيعا 2023 جىلى 9 قاراشادا استانا قالاسىنداعى BAU مەيرامحاناسىندا بولدى.

سوت وتىرىستارىندا وقيعا بولعان كەزدىڭ، دالىرەك، بيشىمبايەۆ سالتاناتتى شاشىنان سۇيرەپ، تەپكىلەگەن سۇمدىق كادرلار كورسەتىلدى.

كەيىنىرەك سوت وتىرىسىندا بايجانوۆ بيشىمبايەۆ سوتقا اكەلە جاتقان كەزدە جاۋاپتارىنا اسەر ەتكىسى كەلگەنىن مالىمدەدى.

"بيشىمبايەۆ "جەدەل جاردەمگە بىرگە حابارلاستىق دەپ ايت" دەدى. "ايتپاساڭ، سەنىڭ باسىڭا كەلسىن، سەنىڭ بالالارىڭنىڭ باسىنا كەلسىن دەپ قارعايمىن" دەدى. تەرگەۋ يزولياتورىندا اندا-ساندا (بيشىمبايەۆپەن - ەسك.) كەزدەسىپ جۇردىك. سول كەزدە "ناشاتىر بەرىپ جاتقاندا، سەن قاراپ تۇردىم دەپ ايت" (دەدى - ەسك.). ءبىراق مەن سىرتتا قالدىم"، - دەدى بايجانوۆ.

بۇعان دەيىن باقىتجان بايجانوۆ بيشىمبايەۆ تاراپىنان وزىنە قىسىم جاسالىپ جاتقانىن ايتتى. سونىمەن قاتار، بولەك وتىرعىسى كەلەتىنىن مالىمدەدى.

"بيشىمبايەۆتىڭ بايجانوۆقا سويلەۋگە مۇمكىندىگى بولماسا ەكەن. بايجانوۆ وزىنە قىسىم كورسەتىلىپ جاتىر دەپ سانايدى. ولاردىڭ اراسىندا قاقتىعىس بولىپ جاتىر. تىم قۇرىعاندا ەرتەڭ (بولەك وتىرسا - ەسك.)"، - دەدى بايجانوۆتىڭ ادۆوكاتى.

مۇنى بايجانوۆتىڭ ءوزى دە راستادى.

"ول ماعان جاۋاپ بەرۋ كەزىندە "بىلاي ايت، بىلاي ايت" دەپ قىسىم كورسەتىپ جاتىر"، - دەدى بايجانوۆ.

باقىتجان بايجانوۆقا قىلمىستىق كودەكستىڭ ەكى بابى بويىنشا ايتىپ تاعىلىپ وتىر:

• 432-بابى (اسا اۋىر قىلمىستى جاسىرىپ قالۋ)؛
• 434-بابى (اسا اۋىر قىلمىستى حابارلاماۋ).