Pavlodar qalasynda báıgeden Qazaqstan chempıonatynyń 8-kezeńi ári osy kúzde Astanada ótetin 5-shi Dúnıejúzilik kóshpendiler oıyndaryna irikteýine arnaldy. Dúbirli dodaǵa elimizdiń barlyq óńirinen 90-nan astam tulpar qatysty, – dep habarlaıdy Dalanews.kz QR Ulttyq sport qaýymdastyǵynyń baspasóz qyzmetine silteme jasap.

Jarys báıgeniń 4 túri boıynsha ótti: Qunan báıge, Top báıge, Jorǵa jarys jáne Alaman báıge, jalpy júlde qory — 24 900 000 teńge.

– Bul báseke – báıgeden Qazaqstan chempıonatynyń 8-kezeńi, al bir jaǵynan osy kúzde Astanada ótetin 5-shi Dúnıejúzilik kóshpendiler oıyndaryna irikteý esebinde ótip jatyr. At jarysqa elimizdiń túkpir túkpirinen eń úzdik jylqylar jınaldy. Olar báıgeniń tórt túrinen, ıaǵnı qunan báıge, top báıge, alaman báıge jáne jorǵa jarys atalymy boıynsha synǵa túsedi. Ár báıge túrine shamamen 25 tulpar qatysyp jatyr. Bul attardyń jaǵdaıy jaqsy, aldaǵy úlken dodaǵa daıyn dep aıta alamyn, – dedi «Báıge» federasıasynyń atqarýshy dırektory Altaı Bımen.

Qunan báıgeden birinshi oryn alǵan Qamysqulaq atty tulpardyń shabandozy Aslanbek Abdyqal jeńis jolynda bapkerdiń keńesi kómek bolǵanyn aıtady.

– Bapkerdiń aıtýymen júrip otyrdym. Ol maǵan jarys bastala sala aldyńǵy topta otyrýǵa keńes berdi. Sońǵy aınalymda birinshi bolyp  alǵa ozdym. Márege bes júz metr qalǵanda artymnan taǵy bir at kele jatty. Jetip ala ma dep qorqyp edim, biraq men birinshi keldim. Endi kóshpendiler oıyndaryna daıyndalamyn, – dep atap ótti jas shabandoz Aslanbek Abdyqal.

II oryndy Naıza atty qunan aldy, shabandozy Arnat Murathan. Júldegerler úshtigin Aıshýaq esimdi atqa mingen Ańsar Arystanbek támamdady.

Top báıgede Ǵasyr atty sáıgúlik, Alıhan Jánibekulyn esimdi shabandozymen úzdik atandy. II oryndy Ravshan, shabandozy Dilnur Nurmuqash ıelendi. İİİ oryndy shabandoz Qaırjan Álıhan Táýekel atty tulparymen jeńip aldy.

Jorǵa jarys qorytyndysyna kelsek: I oryndy ıelengen Orda, shabandozy Iýrıı Lymar. II oryn Vypýsk, shabandozy Anýarbek Abdrahmanov. III oryn Aqjaýyn, shabandozy Erbulan Tileǵalıuly.  

Alaman báıge nátıjesi boıynsha – İ oryndy Soflor Lend esimdi aıǵyr ıelendi, shabandozy Amır Amanuly, İİ oryndy Bereke esimdi jylqy, shabandozy Irınat Sanjarmen jeńip aldy. İİİ orynda Shaıkúreń atty tulpar  shabandozy Arnat Murathan.

İs-sharanyń seriktesteri – QR Ultyq sport qaýymdastyǵy, Respýblıkalyq «Báıge» federasıasy jáne Pavlodar oblystyq ákimdigi.

Eske sala keteıik, Respýblıkalyq «Báıge» federasıasy Qazaqstan Respýblıkasy Ulttyq sport qaýymdastyǵynyń quramyna kiredi.  Qaýymdastyq quramynda budan ózge «Aýdaryspaq», «Kókpar», «Teńge ilý», «Sadaq atý», «Jamby atý», «Qusbegilik», «Asyq atý», «JORYQ» at sporty jáne t.b. federasıalar bar. QR Ulttyq sport qaýymdastyǵyn belgili kásipker, mesenat, «Altyn Qyran Foundation» Qoǵamdyq qory Qamqorshylyq keńesiniń tóraǵasy Islambek Saljanov basqarady.

Aıta keterligi, 8-13 qyrkúıekte Astana qalasynda 5-shi Dúnıejúzilik kóshpendiler oıyndary ótedi. İs-sharaǵa 89 elden 2000-nan astam sportshy qatysady dep josparlanýda. 5-shi Dúnıejúzilik kóshpendiler oıyndarynyń Bas demeýshisi - ALAGEUM ELECTRIC, Oıyndardyń Bas seriktesi - Halyk Bank. Astanada ótetin Dúnıejúzilik kóshpendiler oıyndarynda barlyǵy 21 sport túrinen 97 medal jıyntyǵy sarapqa salynady.