Almatynyń eks-ákimi Baýyrjan Baıbektiń ústinen sotqa aryz túsken. Bul týraly zańger, «STOP zastroıke» qozǵalysynyń múshesi Murat Qasenov aıtty, - dep habarlaıdy Dalanews.kz.
Qasenovtiń sózinshe, ol aryzdy 2021 jyly jazǵan.
«Departament qarastyramyz degendeı boldy. Sebebi olar qadaǵalaýshy organsyz qarastyra almaıdy ǵoı. Al Almatynyń prokýratýrasy qarastyrýdan bas tartty. Sondyqtan Baıbekke qatysty aryzymdy qaıtadan daıyndaımyn. Sebebi 2016 jyly salynǵan jobalarǵa qatysty aıtarlyqtaı zań buzýshylyqtar bar. Sondyqtan ol úshin jaýap bolýy kerek. Adamdy jumystan qýyp qutyla salmaý kerek, jaýapkershilik bolýy qajet. Jalpy qaı ákimniń bolmasyn jumysyna keshendi tekseris júrgizý durys dep esepteımin. Barlyq parametr boıynsha tekserý kerek, bári durys bolsa ary kóterile beredi. Eger qylmystyq jaýapqa tartatyndaı bolsa qylmystyq is qozǵaý kerek. Sol kezde tártip bolýy múmkkin. Al bylaısha ár ákim kelip, bilgenin istep, ol ketse de ary qaraı jalǵasa beredi. Saldaryn qarapaıym halyq kóredi», - deıdi Qasenov «Elmedıaǵa».
Eske salaıyq, buǵan deıin birqatar laýazymdy qyzmet atqarǵan memleket qaıratkeri, Shymkenttiń eks-ákimi Amalbek Tshan Almatynyń burynǵy ákimi Baýyrjan Baıbek memleket qarjysyn qalaı jumsaǵanyn aıtyp bergen bolatyn.
«Áýejaıǵa baratyn jer bar. Sol jolda baǵdarsham turatyn. Onyń bárin rekonstrýksıa jasap, aınalmaly jolǵa aınaldyrdy. Qazir oılaımyn, sonda Almatydaǵy basqa sharýanyń bári bitip qaldy ma? Aınalaǵa aınalmaly jol jasaý kerek pe? Al aınalmaly jol degen bálenbaı mıllıard turady. Baǵdarshamda adamdar, kóp bolsa, 1-2 mınýt qana turady», - deıdi Amalbek Tshan «Demkoratıaly Qazaqstan» YouTube-arnasyna bergen suhbatynda.
Sonymen qatar, Amalbek Tshan taǵy bir eks-ákim – Baqytjan Saǵyntaev memleket qarjysyn qaıda jumsaǵanyn aıtty.
«Ol qur qala ma ana ákimnen? Ana ákim 4-5 jyldyń ishinde mıllıarder bolyp ketti. Saǵyntaev ta kele saldy da áýejaıǵa baratyn jolda aınalmaly jol jasady. Sonda qalanyń barlyq isi, mektepter, balabaqsha, odan basqa myńdaǵan jumys bar sheshilmeı jatqan. Adamdar bosqa shyryldap júrgen joq qoı. Úkimet nege qadaǵalamaıdy?», - deıdi Amalbek Tshan.
Aıta keteıik, Baýyrjan Baıbek Almatyny 2015-2019 jyldary aralyǵynda basqarǵan bolatyn. Keıinnen qalany úsh jyl boıy Baqytjan Saǵyntaev basqardy.
Buǵan deıin Amalbek Tshan Almaty ákimi bolǵan Baıbek, Esimovterdiń jemqorlyqqa qatysy bar ekenin aıtty.
"Qatysy bolmasa, qashyp júre me? Almatyda qyzmet istegen ákimderdiń qaı-qaısy bolmasyn, olardy teksere kelseńiz bári de shyǵady.
Baıbek taza bolsa, nege qashyp júr?! Esimov te solaı. Mynaý kimdiki deseń, jurttyń bári "Esimovtiki" deıdi. Mynaý kimdiki deseń, "Baıbektiki" deıdi.
Olardyń kim ekenine halyqtyń ózi baǵasyn berip jatyr. Kópshilik qalt aıtpaıdy dep durys aıtady", - deıdi ol.
Buǵan deıin Májilis depýtaty Baqytjan Bazarbek te Almatyda jerdi zańsyz bergen belgili sheneýnikterdiń esimin ataǵan bolatyn.
Onyń ishinde, - Ahmetjan Esimov, Imanǵalı Tasmaǵambetov, Baýyrjan Baıbek bar.
«Tipti men ózim zańger retinde Baıbek ákim bolǵan kezinde úsh qaýlysyn zańsyz dep taný týraly sotqa talap-aryz berip, sonyń eki qaýlysyn sottyń sheshimi boıynsha buzdyrtqanmyn. Máselen, bárimizge belgili "Rahat" bazarynyń úlken jerin "TKM" JSHS quqyǵyn shektep, "Almaty SPS" fırmasyna berip jibergen. Al "Almaty SPS" artynda sol Eski Qazaqstannyń ókilderi tur.
Iaǵnı Baýyrjan Baıbektiń jaqyn týystarynyń atyna rásimdelgen TOO-lar. Sóıtip biz olardy sotqa berip, 3 jyl sottastyq.
2022 jyly Almaty qalalyq sotynyń sheshimimen "Almaty SPS" fırmasyna berilgen jer zańsyz ekeni aıtylyp, tıisti sottyń sheshimi shyqty. Basqa memleketterde bul qaýlyny alyp, prokýratýraǵa jiberedi. Prokýratýrada qylmystyq is qozǵaýǵa bolatyn edi", - deıdi Baqytjan Bazarbek Adal Adam YouTube arnasyna bergen suhbatynda.
