الماتىنىڭ ەكس-اكىمى باۋىرجان بايبەكتىڭ ۇستىنەن سوتقا ارىز تۇسكەن. بۇل تۋرالى زاڭگەر، «STOP زاسترويكە» قوزعالىسىنىڭ مۇشەسى  مۇرات قاسەنوۆ ايتتى، - دەپ حابارلايدى Dalanews.kz.

قاسەنوۆتىڭ سوزىنشە، ول ارىزدى 2021 جىلى جازعان.

«دەپارتامەنت قاراستىرامىز دەگەندەي بولدى. سەبەبى ولار قاداعالاۋشى ورگانسىز قاراستىرا المايدى عوي. ال الماتىنىڭ پروكۋراتۋراسى قاراستىرۋدان باس تارتتى. سوندىقتان بايبەككە قاتىستى ارىزىمدى قايتادان دايىندايمىن. سەبەبى 2016 جىلى سالىنعان جوبالارعا قاتىستى ايتارلىقتاي زاڭ بۇزۋشىلىقتار بار. سوندىقتان ول ءۇشىن جاۋاپ بولۋى كەرەك. ادامدى جۇمىستان قۋىپ قۇتىلا سالماۋ كەرەك، جاۋاپكەرشىلىك بولۋى قاجەت. جالپى قاي اكىمنىڭ بولماسىن جۇمىسىنا كەشەندى تەكسەرىس جۇرگىزۋ دۇرىس دەپ ەسەپتەيمىن. بارلىق پارامەتر بويىنشا تەكسەرۋ كەرەك، ءبارى دۇرىس بولسا ارى كوتەرىلە بەرەدى. ەگەر قىلمىستىق جاۋاپقا تارتاتىنداي بولسا قىلمىستىق ءىس قوزعاۋ كەرەك. سول كەزدە ءتارتىپ بولۋى مۇمككىن. ال بىلايشا ءار اكىم كەلىپ، بىلگەنىن ىستەپ، ول كەتسە دە ارى قاراي جالعاسا بەرەدى. سالدارىن قاراپايىم حالىق كورەدى»، - دەيدى قاسەنوۆ «ەلمەدياعا».

ەسكە سالايىق، بۇعان دەيىن ءبىرقاتار لاۋازىمدى قىزمەت اتقارعان مەملەكەت قايراتكەرى، شىمكەنتتىڭ ەكس-اكىمى امالبەك تشان الماتىنىڭ بۇرىنعى اكىمى باۋىرجان بايبەك مەملەكەت قارجىسىن قالاي جۇمساعانىن ايتىپ بەرگەن بولاتىن. 

«اۋەجايعا باراتىن جەر بار. سول جولدا باعدارشام تۇراتىن. ونىڭ ءبارىن رەكونسترۋكسيا جاساپ، اينالمالى جولعا اينالدىردى. ءقازىر ويلايمىن، سوندا الماتىداعى باسقا شارۋانىڭ ءبارى ءبىتىپ قالدى ما؟ اينالاعا اينالمالى جول جاساۋ كەرەك پە؟ ال اينالمالى جول دەگەن بالەنباي ميلليارد تۇرادى. باعدارشامدا ادامدار، كوپ بولسا، 1-2 مينۋت قانا تۇرادى»، - دەيدى امالبەك تشان «دەمكوراتيالى قازاقستان» YouTube-ارناسىنا بەرگەن سۇحباتىندا.

سونىمەن قاتار، امالبەك تشان تاعى ءبىر ەكس-اكىم – باقىتجان ساعىنتايەۆ مەملەكەت قارجىسىن قايدا جۇمساعانىن ايتتى.

«ول قۇر قالا ما انا اكىمنەن؟ انا اكىم 4-5 جىلدىڭ ىشىندە ميللياردەر بولىپ كەتتى. ساعىنتايەۆ تا كەلە سالدى دا اۋەجايعا باراتىن جولدا اينالمالى جول جاسادى. سوندا قالانىڭ بارلىق ءىسى، مەكتەپتەر، بالاباقشا، ودان باسقا مىڭداعان جۇمىس بار شەشىلمەي جاتقان. ادامدار بوسقا شىرىلداپ جۇرگەن جوق قوي. ۇكىمەت نەگە قاداعالامايدى؟»، - دەيدى امالبەك تشان.  

ايتا كەتەيىك، باۋىرجان بايبەك الماتىنى 2015-2019 جىلدارى ارالىعىندا باسقارعان بولاتىن. كەيىننەن قالانى ءۇش جىل بويى باقىتجان ساعىنتايەۆ باسقاردى.

بۇعان دەيىن امالبەك تشان الماتى اكىمى بولعان بايبەك، ەسىموۆتەردىڭ جەمقورلىققا قاتىسى بار ەكەنىن ايتتى.

"قاتىسى بولماسا، قاشىپ جۇرە مە؟ الماتىدا قىزمەت ىستەگەن اكىمدەردىڭ قاي-قايسى بولماسىن، ولاردى تەكسەرە كەلسەڭىز ءبارى دە شىعادى.

بايبەك تازا بولسا، نەگە قاشىپ ءجۇر؟! ەسىموۆ تە سولاي. مىناۋ كىمدىكى دەسەڭ، جۇرتتىڭ ءبارى "ەسىموۆتىكى" دەيدى. مىناۋ كىمدىكى دەسەڭ، "بايبەكتىكى" دەيدى.

ولاردىڭ كىم ەكەنىنە حالىقتىڭ ءوزى باعاسىن بەرىپ جاتىر. كوپشىلىك قالت ايتپايدى دەپ دۇرىس ايتادى"، - دەيدى ول.

بۇعان دەيىن ءماجىلىس دەپۋتاتى باقىتجان بازاربەك تە الماتىدا جەردى زاڭسىز بەرگەن بەلگىلى شەنەۋنىكتەردىڭ ەسىمىن اتاعان بولاتىن.

ونىڭ ىشىندە، - احمەتجان ەسىموۆ، يمانعالي تاسماعامبەتوۆ، باۋىرجان بايبەك بار. 

«ءتىپتى مەن ءوزىم زاڭگەر رەتىندە بايبەك اكىم بولعان كەزىندە ءۇش قاۋلىسىن زاڭسىز دەپ تانۋ تۋرالى سوتقا تالاپ-ارىز بەرىپ، سونىڭ ەكى قاۋلىسىن سوتتىڭ شەشىمى بويىنشا بۇزدىرتقانمىن. ماسەلەن، بارىمىزگە بەلگىلى "راحات" بازارىنىڭ ۇلكەن جەرىن "تكم" ج ش س قۇقىعىن شەكتەپ، "الماتى سپس" فيرماسىنا بەرىپ جىبەرگەن. ال "الماتى سپس" ارتىندا سول ەسكى قازاقستاننىڭ وكىلدەرى تۇر.

ياعني باۋىرجان بايبەكتىڭ جاقىن تۋىستارىنىڭ اتىنا راسىمدەلگەن توو-لار. ءسويتىپ ءبىز ولاردى سوتقا بەرىپ، 3 جىل سوتتاستىق.

2022 جىلى الماتى قالالىق سوتىنىڭ شەشىمىمەن "الماتى سپس" فيرماسىنا بەرىلگەن جەر زاڭسىز ەكەنى ايتىلىپ، ءتيىستى سوتتىڭ شەشىمى شىقتى. باسقا مەملەكەتتەردە بۇل قاۋلىنى الىپ، پروكۋراتۋراعا جىبەرەدى. پروكۋراتۋرادا قىلمىستىق ءىس قوزعاۋعا بولاتىن ەدى"، - دەيدى باقىتجان بازاربەك Adal Adam YouTube ارناسىنا بەرگەن سۇحباتىندا.