Baibek: «Qazaq tilinde sóileý kerek»
Almatylyqtar men qonaqtardy Naýryz merekesimen quttyqtaǵan qala ákimi Baýyrjan Baibektiń sózi mándi de, mańyzdy boldy. Astana alańyndaǵy merekelik basty sózin tek memlekettik tilde sóilegen Almaty ákimi Alataý aýdanyndaǵy Atletter aýlyna da kelip, eldi quttyqtady.
Talai jyl páter kezeginde turǵandarmen qatar taiaýda dúrildep ótken Dúniejúzilik Stýdentter Ýniversiadasy biletterine oinalǵan lotoreiada páter utyp alǵandar da, «Ýniversiada murasy» aiasynda ákim qolynan páter kiltin alyp, baqytqa keneldi.
Osyndai biletterdiń birin utyp alyp, eki bólmeli páterge ie bolǵan Juldyz esimdi almatylyq óz qýanyshyn Resei tilinde jetkizdi. Almaty qalasynyń ákimi Baýyrjan Baibek Juldyzdan:
– Almatyda turasyń ba?-dep qazaq tilinde surady.
– Iá, tátemmen birge turamyn.
– Qai jaqtan keldiń?
– Qyzylordadan kelgenmin eki jyl buryn.
Almatynyń ákimi qazaqsha sóilep turǵasyn, 99 paiyz qazaq turatyn Qyzylordadan kelgen Juldyz uialyp qaldy-aý deimin, tili bul joly qazaqsha shyqty…
– Qaida isteisiń?
– Bankte.
– Páteriń qutty bolsyn! Biraq qazaq tilinde sóileý kerek. Barlyq kezde qazaq tilinde sóilep úirenińder. Onyń ústine búgin Ulystyń Uly kúni Naýryz merekesin toilap jatyrmyz.
Uialyp qalǵan Juldyz «jaraidy» dep kelisimin berdi.
Alańǵa jinalǵan eldiń bári Baýyrjan Baibekke qatty riza bolyp, qýana qol soqty.
Mine, Táýelsiz Qazaqstannyń ulttyq múddeni – memlekettik múddeni oilaityn, oilap qana qoimai, iske asyratyn isker de, bilikti ákimi! Mine, el bolashaǵy osyndai sarabdal saiasatkerlerde!
Qudai memlekettik tilde sóileýdi elden talap etpek túgili, ózderi qazaqsha sóileýden bas tartatyn ministrler men elshilerden, shekesi tar sheneýnikterden saqtasyn! Biraq olardyń kúni ótip bara jatqany kúnde sezile bastady qazir… Qudaiǵa shúkir!
Ulystyń Uly kúni qutty bolsyn!
Qazybek ISA
qazaquni.kz
