Baian kúieýinen zábir kórgen árbir áieldi qorǵaýǵa bekinip otyr
Baian Maqsatqyzynyń aitýynsha, áielder quqyǵyn qorǵaityn qor ashamyn dep aitqaly beri prodiýserden kómek suraityn bikeshter kóbeigen.
“Barlyq jerde, áýejaida, kóshede, dúkende, tipti kafede janyma áielder kelip jatady. “Baian, sizdi birneshe minýtqa bola ma?” dep shaqyryp alyp, sumdyq hikaialaryn aitady”, – deidi Maqsatqyzy.
Prodiýser aldaǵy aptada turmystyq zombylyqtyń qurbany bolǵan áielderdiń birimen baspasóz konferentsiiasyn ótkizýdi josparlap otyr.
– Búgin túsirilim alańynda kómek surap kelgen áielmen sóilestim. Úsh jyldan beri turmystyq zorlyq-zombylyqqa ushyrap keledi eken. Budan bylai jeke ózimnen kómek suraǵan ár áielge kómektesetin bolamyn, – dep atap ótti Maqsatqyzy.
Qazirgi ýaqytta Baian jobany ázirleýge bilek sybana kirisip ketken. Ol osy ispen ainalysyp júrgen jandarmen pikir almasyp, tipti, tájiribe jinaý úshin shetelge attanbaq niette.
– Bolashaq qordyń atyn da oilastyryp qoidym, “Aiý tas” bolady. Ejelgi túrki tilinen aýdarǵanda “otbasy” degendi bildiredi. Qazaqstanda áielder quqyǵyn qorǵaýmen ainalysatyn júzge jýyq qor bar. Biz de qarap otyrmai, zerttedik. Olar da jumys istep jatyr. Biraq biz qalaǵandai nátije joq. Júz birinshi qor qurǵym kelmeidi, – deidi Baian.
Budan ózge, prodiýser qazirgi tańda demeýshi izdep júrgenin jasyrmady. Aitýynsha, kitap satylymynan túsken qarjy qor jumysyn iske qosýǵa jetkiliksiz.
“Apta saiyn aqsha túsedi, sondyqtan shatasýym múmkin. Jalpy shamamen 40 milliondai aqsha kerek dep oilaimyn”, – deidi Baian.
Maqsatqyzy “SiSiTai” miýziklin taspalap bolǵan soń shyǵarmashylyqtan biraz ýaqytqa qol úzip, qor jumysymen ainalyspaq niette.
