Baian Esentaevanyń kúieýine qatysty sot otyrysy bastaldy
Bul isti sot tóraǵasy Berikjan Baijúnisov qaraidy. Onyń aitýynsha, Esentaevtyń isimen alqa biler soty ainalysady. Sondai-aq, ol sot otyrysyn jabyq túrde ótkizý týraly sheshim qabyldanǵan.
Sebebi Esentaevqa seksýaldyq mándegi aiyptar taǵylyp otyr. Sonymen qatar Baqytbek Esentaevqa QR Qylmystyq kodeksiniń 24-babynan basqa ("Qylmysqa daiyndalý jáne qylmys jasaýǵa oqtalý"), QR Qylmystyq kodeksiniń 121-baby ("Zorlaý") boiynsha aiyp taǵylǵany belgili boldy. Aita keteiik, Baian Esentaeva sot otyrysyna kelmegen. Sottalýshynyń advokaty Bekbolat Jekseitov.
Osyǵan deiin Baian Esentaeva jurtty dúrliktirgen oqiǵadan keiin birinshi ret suhbat bergen bolatyn. Videosuhbat Dinara Sátjannyń YouTube hostingindegi arnasynda paida boldy.
Eske salaiyq, Baian Esentaeva 10 maýsymda aýyr jaǵdaida Talǵardaǵy aýrýhanaǵa túsken bolatyn. Tergeýdiń málimetinshe, ony kúieýi Baqytbek Esentaev aiaýsyz uryp soǵyp, birneshe ret pyshaqtaǵan. Bul oqiǵa Eńbekshi aýylynyń mańynda Qulja tas jolynda bolǵan.
