Baian Esentaeva men Nurtas Adambaevty test suraqtaryna engizgen maman jumysynan alastatyldy
– Testolog maman belgili rejiser Ermek Tursynovtyń suhbatyn paidalanyp, oqýshylardyń bilimin tekserý úshin UBT suarqtaryna shoý-biznes ókilderine qatysty suraqtar engizip jibergen. Búginde ol test suraqtaryn daiyndaýshylardyń qatarynan shyǵarylyp, qatań eskertý jasalyndy, – dep Erlan Saǵadiev bul máseleni bir jaqty etkenin resmi túrde málimdedi.
Kezinde test suraqtaryn qurastyrýshylar oqýshylar qazirgi ómirimizdegi tanymal tulǵalardy bilý kerek bolǵan soń, shoý-biznes ókilderin UBT suraqtaryna engizgenderin aitqany esimizde. Sol kezde test suraqtary kim kóringenniń oiyna kelgenin engizip, jaza beretin «tilek dápteri» me dep qalǵan edik.
Endi Saǵadievtyń ózi muny test qurastyrýshylar tarapynan jiberilgen úlken qatelik ekenin moiyndap, mektep bitirýshilerdiń tanym kókjiegin keńeitýge umtylǵan sabazdy test suraqtaryn daiyndaý isinen shettetti.
Erekeń áiteýir araǵa birneshe ai salyp bolsa da bul máseleni halyqtyń paidasyna sheshkendei boldy. O bastaq bul máseleni yń-shyńsyz sheshe salsa bolar edi. Shamasy Erlan Saǵadeiv depýtattardyń ózine top bolyp hat jazǵanyn kútse kerek. Bolmasa oqý jylynyń aiaqtalǵanyn kútti me? Ókinishke orai, bizge bul jaǵy túsiniksiz. Biletimiz bizdiń shendiler halyqtyń oi-pikirine dál ýaqytynda nazarǵa alyp, áreket etpeidi. Mindetti túrde olarǵa bireý aityp, kózderine shuqyp kórsetýi kerek.
Depýtattar ministrge joldaǵan úshbý hattarynda aldaǵy ýaqytta UBT suraqtaryn qoǵam aldynda talqylaý máselesin de kótergen-di. Biraq ministr UBT suraqtary memlekettik qupiialardyń qataryna jatatyndyqtan, suraqtardyń kópshiliktiń aldynda talqylaýǵa jatpaitynyn alǵa tartty.
Qalai desekte «myqty bolsańdar men siiaqty test suraqtaryna enip kórińder» dep keýdesin kergen Baian Maqsatqyzyna obal boldy. Baian hanym óz esimi test suraqtarynan engende ózin el úshin jarǵaq qulaǵy jastyqqa timei eńbek etip júrgen adamdai sezingen edi. Endi ne ister eken?
N.ÁÝBÁKIR.
