– Elbasy, partiia Lideri Nursultan Nazarbaevtyń tapsyrmasy boiynsha biz ár oblysta, qalada jáne aýdanda sailaýaldy ýádelerdi oryndaý boiynsha 217 jol kartasyn baqylaýdamyz. Memleket Basshysy Qasym-Jomart Toqaev jariia etken «Ózgerister joly: Ár azamatqa laiyqty ómir!» sailaýaldy baǵdarlamasy óńirlerde 14%-ke iske asyryldy, – dep atap ótti Baýyrjan Baibek.
Onyń aitýynsha, jyl basynan beri 9 mln sharshy metrge jýyq turǵyn úi salynǵan, 131 mektep, 70 balabaqsha jáne 22 meditsinalyq nysan ashylǵan. 200 myńnan astam adam turaqty jumys oryndaryna ornalastyryldy. 837 mlrd teńgege investitsiia tartý arqyly 89 kásiporyn iske qosyldy.
Soltústik Qazaqstan oblysynda josparlanǵan 1134 is-sharanyń osy kúni 26%-ti oryndaldy. Máselen, biyl 10 sút-taýar fermasy iske qosylady, 13 myń basqa arnalǵan 2 bordaqylaý alańy, 2 qus fabrikasy salynady jáne t.b.
El azamattarynyń 40%-ten astamy aýylda turatynyn eskere otyryp, Elbasynyń «Aýyl – El besigi» jobasy sheńberinde aýyldy damytý, aýyl turǵyndarynyń ómirin jaqsartý úshin jaǵdailar jasalyp jatyr. Sondyqtan filial tóraǵasy, oblys ákimi Qumar Aqsaqalovpen birge ol Aiyrtaý aýdanyndaǵy «Ádemi Astyq» JShS-nyń quny 1 mlrd teńgeden asatyn sút-taýar fermasy qurylysynyń barysymen tanysty.
– Sharýa qojalyǵy ornalasqan aýyldyń tarihy qyzyqty. 2004 jyly halyqtyń údere ketýine bailanysty Prekrasnoe aýylynyń shyn máninde tirshiligi toqtap qaldy. 2011 jyly «Nur Otan» partiiasynan oblystyq máslihattyń depýtaty Baqyt Qusaiynov aýylǵa oralyp, mal ósirýge kiristi. Jobanyń tabystylyǵyn eskere otyryp, depýtat jumys kúshi artyq óńirlerden qonys aýdarý baǵdarlamasyn belsendi qoldai bastady. Qazirgi kezde 14 úi salyndy, taǵy 10 úidiń qurylysy júrip jatyr, – dep jazdy Baýyrjan Baibek Facebook-tegi paraqshasynda.
Sailaýaldy baǵdarlamanyń aiasynda bul máselege erekshe nazar aýdarylatyny atap ótildi. «Diplommen aýylǵa» baǵdarlamasy boiynsha kelgen jas mamandarǵa turǵyn úi satyp alýǵa jeńildikpen nesie bólinetin bolady. Óńirlerdiń deńgeiinde jas otbasylardyń baspana máselesin sheshý úshin baǵdarlamalar ázirlenedi. Jalpy, el kóleminde jyl saiyn 700 myńǵa jýyq adam jumyspen qamtýdyń belsendi túrlerimen qamtylady.
