– ەلباسى، پارتيا ليدەرى نۇرسۇلتان نازاربايەۆتىڭ تاپسىرماسى بويىنشا ءبىز ءار وبلىستا، قالادا جانە اۋداندا سايلاۋالدى ۋادەلەردى ورىنداۋ بويىنشا 217 جول كارتاسىن باقىلاۋدامىز. مەملەكەت باسشىسى قاسىم-جومارت توقايەۆ جاريا ەتكەن «وزگەرىستەر جولى: ءار ازاماتقا لايىقتى ءومىر!» سايلاۋالدى باعدارلاماسى وڭىرلەردە 14%-كە ىسكە اسىرىلدى، – دەپ اتاپ ءوتتى باۋىرجان بايبەك.
ونىڭ ايتۋىنشا، جىل باسىنان بەرى 9 ملن شارشى مەترگە جۋىق تۇرعىن ءۇي سالىنعان، 131 مەكتەپ، 70 بالاباقشا جانە 22 مەديسينالىق نىسان اشىلعان. 200 مىڭنان استام ادام تۇراقتى جۇمىس ورىندارىنا ورنالاستىرىلدى. 837 ملرد تەڭگەگە ينۆەستيسيا تارتۋ ارقىلى 89 كاسىپورىن ىسكە قوسىلدى.
سولتۇستىك قازاقستان وبلىسىندا جوسپارلانعان 1134 ءىس-شارانىڭ وسى كۇنى 26%ء-تى ورىندالدى. ماسەلەن، بيىل 10 ءسۇت-تاۋار فەرماسى ىسكە قوسىلادى، 13 مىڭ باسقا ارنالعان 2 بورداقىلاۋ الاڭى، 2 قۇس فابريكاسى سالىنادى جانە ت.ب.
ەل ازاماتتارىنىڭ 40%-تەن استامى اۋىلدا تۇراتىنىن ەسكەرە وتىرىپ، ەلباسىنىڭ «اۋىل – ەل بەسىگى» جوباسى شەڭبەرىندە اۋىلدى دامىتۋ، اۋىل تۇرعىندارىنىڭ ءومىرىن جاقسارتۋ ءۇشىن جاعدايلار جاسالىپ جاتىر. سوندىقتان فيليال ءتوراعاسى، وبلىس اكىمى قۇمار اقساقالوۆپەن بىرگە ول ايىرتاۋ اۋدانىنداعى «ادەمى استىق» جشس-نىڭ قۇنى 1 ملرد تەڭگەدەن اساتىن ءسۇت-تاۋار فەرماسى قۇرىلىسىنىڭ بارىسىمەن تانىستى.
– شارۋا قوجالىعى ورنالاسقان اۋىلدىڭ تاريحى قىزىقتى. 2004 جىلى حالىقتىڭ ۇدەرە كەتۋىنە بايلانىستى پرەكراسنوە اۋىلىنىڭ شىن مانىندە تىرشىلىگى توقتاپ قالدى. 2011 جىلى «Nur Otan» پارتياسىنان وبلىستىق ءماسليحاتتىڭ دەپۋتاتى باقىت قۇسايىنوۆ اۋىلعا ورالىپ، مال وسىرۋگە كىرىستى. جوبانىڭ تابىستىلىعىن ەسكەرە وتىرىپ، دەپۋتات جۇمىس كۇشى ارتىق وڭىرلەردەن قونىس اۋدارۋ باعدارلاماسىن بەلسەندى قولداي باستادى. قازىرگى كەزدە 14 ءۇي سالىندى، تاعى 10 ءۇيدىڭ قۇرىلىسى ءجۇرىپ جاتىر، – دەپ جازدى باۋىرجان بايبەك Facebook-تەگى پاراقشاسىندا.
سايلاۋالدى باعدارلامانىڭ اياسىندا بۇل ماسەلەگە ەرەكشە نازار اۋدارىلاتىنى اتاپ ءوتىلدى. «ديپلوممەن اۋىلعا» باعدارلاماسى بويىنشا كەلگەن جاس ماماندارعا تۇرعىن ءۇي ساتىپ الۋعا جەڭىلدىكپەن نەسيە بولىنەتىن بولادى. وڭىرلەردىڭ دەڭگەيىندە جاس وتباسىلاردىڭ باسپانا ماسەلەسىن شەشۋ ءۇشىن باعدارلامالار ازىرلەنەدى. جالپى، ەل كولەمىندە جىل سايىن 700 مىڭعا جۋىق ادام جۇمىسپەن قامتۋدىڭ بەلسەندى تۇرلەرىمەن قامتىلادى.
