"Batkanyń aqyry". Búgin Belarýste jalpyulttyq ereýil bastalady
Telegram-arnasynda jeksenbilik aktsiiany qorytyndylap jazba jariialaǵan Tihanovskaia:
"Búgin rejim qolynan kúsh qoldaný ǵana keletinin taǵy bir ret dáleldedi. Alaida kópke jáne perzenthana terezesiniń túbine qulaq tundyratyn granata laqtyrý - bul kúsh emes. Rejim shyndyqty aityp, óz sózine jaýap berýge jáne adamdardyń talaptaryn oryndaýǵa daiyn emes. Demek, bul rejim belorýs halqyna laiyq emes" dep jazdy.
Jeksenbi kúni Minski men Belarýstiń ózge qalalarynda marsh ótip, onda halyqtyq ýltimatým merziminiń aiaqtalǵany aityldy. Osyǵan deiin Tihanovskaia Aleksandr Lýkashenkoǵa ýltimatým qoiyp, 26 qazanǵa deiin bilikten bas tartyp, sasiai tutqyndardy bosatýdy talap etken.
Bilik talaptardy oryndamasa, elde jalpyulttyq ereýil bastalyp, joldar jabylady, memlekettik kásiporyn ónimderine boikot jariialanatyny aitylǵan edi. Tihanovskaianyń sońǵy jazbasynda jol jabý jaily aitylmaidy.
25 qazanda birqatar qalalarda arnaiy jasaq pen militsiia narazylyq aktsiiasyna qatysqandarǵa shara ótkizýine kedergi jasaýǵa tyrysty, ondaǵan adam ustaldy. Minskide kúshtik qurylymdar demonstranttarǵa qulaq tundyratyn granata laqtyryp, rezeńke oq qoldanǵan. Zardap shekkender bar.
Belarýste narazylyq aktsiialary 9 tamyzdan beri jalǵasyp keledi. Ortalyq sailaý komissiiasy ol kezde prezident sailaýynda Aleksandr Lýkashenko jeńdi dep málimdegen edi. Qarsylastary sailaý nátijesi burmalandy dep esepteidi. Eýroodaq sailaý qorytyndysyn moiyndamady. Narazylyq aktsiialary kezinde myńdaǵan adam jaraqattandy, qaza bolǵandar da bar.
