Semeide jasóspirimniń qazasyna qatysty tekserý bastaldy: ministr ata-ana býllingi máselesin kóterdi

Semeide jasóspirimniń qazasyna qatysty tekserý bastaldy: ministr ata-ana býllingi máselesin kóterdi
Ashyq derekkóz

Semeide kámeletke tolmaǵan jasóspirimniń qazasyna bailanysty politsiia tekserý júrgizip jatyr. Oqiǵanyń yqtimal sebepteri, sonyń ishinde ata-ananyń qysymy men oqý úlgerimine qatysty mán-jailar da nazarǵa alyndy. Bul týraly Ishki ister ministrliginiń ókili men Oqý-aǵartý ministri málimdedi, dep habarlaidy dalanews.kz.

Ishki ister ministrligi Ákimshilik politsiia komiteti Iývenaldy politsiia basqarmasynyń bastyǵy Ashat Dúisembekov Quryltaida ótken brifingte Semeidegi oqiǵaǵa qatysty pikir bildirdi.

«Semeidegi jaǵdaiǵa kelsek, mundai oqiǵa shynymen bolǵan jáne tirkeldi. Qazir tekserý júrgizilip jatyr», - dedi ol.

Jýrnalister jasóspirimniń qazasyna oqý úlgeriminiń tómendigi nemese ata-anasynyń qysymy sebep bolýy múmkin be dep surady.

Oqý-aǵartý ministri Juldyz Súleimenova ata-analar tarapynan bolatyn býlling máselesin jeke qarastyrý qajet ekenin aitty.

Ministrdiń sózinshe, Ákimshilik quqyq buzýshylyq týraly kodekste kámeletke tolmaǵandar arasyndaǵy býlling úshin ákimshilik jaýapkershilik qarastyrylǵan. Alaida ata-analardyń balalarǵa psihologiialyq qysym kórsetýi máselesin de quqyqtyq turǵydan pysyqtaý qajet.

«Ata-analar tarapynan bolatyn býlling máselesin Ishki ister ministrligimen, ata-analar qaýymdastyǵymen jáne Ádilet ministrligimen birlesip jan-jaqty qarastyrýymyz kerek dep oilaimyn. Biz jylyna eki ret respýblikalyq ata-analar jinalysyn ótkizemiz. Onda psihologtar men pán muǵalimderi ata-analarmen jumys isteidi. Biraq ata-analar - bólek sanat. Biz olarǵa balany qalai tárbieleý kerektigin nusqai almaimyz», - dedi ministr.

Juldyz Súleimenova Oqý-aǵartý ministrliginiń otbasylar men úi ishindegi tárbie máselelerine tikelei aralasýǵa ókilettigi joq ekenin de atap ótti.

Sonymen qatar vedomstvo Bala quqyqtaryn qorǵaý týraly zańǵa ózgerister men tolyqtyrýlar engizý jónindegi birlesken zań jobasyn ázirleýge qatysyp jatqan vedomstvoaralyq jumys tobyn qurǵan. Joba aiasynda ata-analardyń jaýapkershiligi men bala tárbiesine qatysty tásilderdi qaita qaraý josparlanyp otyr.