Osy oqiǵadan keiin Batys elderi Aleksadr Lýkashenkonyń bul isin aiyptap, aldaǵy ýaqytta Belarýstiń ústinen ushaqtaryn ushyrmaitynyn aitty. Óz kezeginde Air Astana áýe kompaniiasy Almatydan Minskige tikelei reisti ushyrýdy keiinge qaldyrdy.
Air Astana reistiń ne úshin ushpaitynyn ázirshe túsindirgen joq. Áýe kompaniiasy Almatydan Minskige alǵashqy reisti 31 mamyrda jiberýdi josparlaǵan.
Iindýstriia jáne infrastrýktýralyq damý ministriniń baspasóz hatshysy Madiiar Ýaqpaev «Qazaqstan Belarýs ústimen ushý máselesin vedomstvoaralyq komissiia jiynynda qaraidy» degen.
Osyǵan deiin Latviia ushaqtaryn Belarýs ústimen ushyrmaitynyn málimdegen. Budan bólek Eýropa odaǵy elderiniń liderleri Ryanair ushaǵyn Máskeýge májbúrlep qondyryp, jýrnalist Roman Protasevichti ustaǵany úshin Aleksandr Lýkashenko ákimshiligine sanktsiia salýdy qarastyrmaq.
Ýkraina prezidenti Vladimir Zelenskii úkimetke Belarýspen áýe reisterin toqtatýdy jáne bul eldiń tóbesimen ushaq ushyrýǵa tyiym salýdy tapsyrdy.
23 mamyrda Ryanair áýe kompaniiasynyń Grekiiadan Litvaǵa bara jatqan FR497 reisi kenetten baǵytyn ózgertip, Minskige qonýǵa májbúr boldy. Belarýs biligi arnaiy áskeri ushaq jiberip, reiste bomba bolýy múmkin dep Ryanair ushaǵyn Minskige burǵan. Borttan bomba tabylmady, esesine Belarýs politsiiasy ushaqta bolǵan oppozitsiialyq jýrnalist, NEXTA Live telegram kanalynyń qurýshylardyń biri Roman Protasevichti tutqyndady.
Eýropa liderleri men AQSh bul jaitqa Aleksandr Lýkashenkony aiyptap, jýrnalisti dereý bosatýdy talap etti. Protasevich turatyn Litva ushaqty májbúrlep qondyrý faktisine bailanysty qylmystyq is qozǵady.
Roman Protasevich – byltyr tamyzdaǵy prezident sailaýynan keiingi narazylyq aktsiialarynan habar taratqan NEXTA Live Telegram arnasynyń negizin qalaýshylardyń biri.
Byltyr qarashada Belarýs biligi «jappai tártippsizdikterdi uiymdastyryp, qoǵamdyq tártipti buzdy jáne áleýmettik alaýyzdyq týǵyzdy" degen kúdikpen Roman Protasevich pen onyń áriptesi Stepan Pýtilaǵa qarsy tergeý bastaǵan edi.
1994 jyldan beri bilikte otyrǵan Lýkashenko 2020 jyly prezident sailaýynda jeńiske jetti dep habarlanǵan soń elde jappai narazylyq bastaldy. Sodan beri bilik 30 myńnan astam adamdy ustap, júzdegen adamdy uryp-soqty, jýrnalisterdi qýdalai bastady.
