وسى وقيعادان كەيىن باتىس ەلدەرى الەكسادر لۋكاشەنكونىڭ بۇل ءىسىن ايىپتاپ، الداعى ۋاقىتتا بەلارۋستىڭ ۇستىنەن ۇشاقتارىن ۇشىرمايتىنىن ايتتى. ءوز كەزەگىندە Air Astana اۋە كومپانياسى الماتىدان مينسكىگە تىكەلەي رەيستى ۇشىرۋدى كەيىنگە قالدىردى.
Air Astana رەيستىڭ نە ءۇشىن ۇشپايتىنىن ازىرشە تۇسىندىرگەن جوق. اۋە كومپانياسى الماتىدان مينسكىگە العاشقى رەيستى 31 مامىردا جىبەرۋدى جوسپارلاعان.
ييندۋستريا جانە ينفراسترۋكتۋرالىق دامۋ ءمينيسترىنىڭ باسپا ءسوز حاتشىسى ماديار ۋاقپايەۆ «قازاقستان بەلارۋس ۇستىمەن ۇشۋ ماسەلەسىن ۆەدومستۆوارالىق كوميسسيا جيىنىندا قارايدى» دەگەن.
وسىعان دەيىن لاتۆيا ۇشاقتارىن بەلارۋس ۇستىمەن ۇشىرمايتىنىن مالىمدەگەن. بۇدان بولەك ەۋروپا وداعى ەلدەرىنىڭ ليدەرلەرى Ryanair ۇشاعىن ماسكەۋگە ماجبۇرلەپ قوندىرىپ، جۋرناليست رومان پروتاسيەۆيچتى ۇستاعانى ءۇشىن الەكساندر لۋكاشەنكو اكىمشىلىگىنە سانكسيا سالۋدى قاراستىرماق.
ۋكراينا پرەزيدەنتى ۆلاديمير زەلەنسكيي ۇكىمەتكە بەلارۋسپەن اۋە رەيستەرىن توقتاتۋدى جانە بۇل ەلدىڭ توبەسىمەن ۇشاق ۇشىرۋعا تىيىم سالۋدى تاپسىردى.
23 مامىردا Ryanair اۋە كومپانياسىنىڭ گرەكيادان ليتۆاعا بارا جاتقان FR497 رەيسى كەنەتتەن باعىتىن وزگەرتىپ، مينسكىگە قونۋعا ءماجبۇر بولدى. بەلارۋس بيلىگى ارنايى اسكەري ۇشاق جىبەرىپ، رەيستە بومبا بولۋى مۇمكىن دەپ Ryanair ۇشاعىن مينسكىگە بۇرعان. بورتتان بومبا تابىلمادى، ەسەسىنە بەلارۋس پوليسياسى ۇشاقتا بولعان وپپوزيسيالىق جۋرناليست، NEXTA Live تەلەگرام كانالىنىڭ قۇرۋشىلاردىڭ ءبىرى رومان پروتاسيەۆيچتى تۇتقىندادى.
ەۋروپا ليدەرلەرى مەن اقش بۇل جايتقا الەكساندر لۋكاشەنكونى ايىپتاپ، ءجۋرناليستى دەرەۋ بوساتۋدى تالاپ ەتتى. پروتاسيەۆيچ تۇراتىن ليتۆا ۇشاقتى ماجبۇرلەپ قوندىرۋ فاكتىسىنە بايلانىستى قىلمىستىق ءىس قوزعادى.
رومان پروتاسيەۆيچ – بىلتىر تامىزداعى پرەزيدەنت سايلاۋىنان كەيىنگى نارازىلىق اكسيالارىنان حابار تاراتقان NEXTA Live Telegram ارناسىنىڭ نەگىزىن قالاۋشىلاردىڭ ءبىرى.
بىلتىر قاراشادا بەلارۋس بيلىگى «جاپپاي تارتىپپسىزدىكتەردى ۇيىمداستىرىپ، قوعامدىق ءتارتىپتى بۇزدى جانە الەۋمەتتىك الاۋىزدىق تۋعىزدى" دەگەن كۇدىكپەن رومان پروتاسيەۆيچ پەن ونىڭ ارىپتەسى ستەپان پۋتيلاعا قارسى تەرگەۋ باستاعان ەدى.
1994 جىلدان بەرى بيلىكتە وتىرعان لۋكاشەنكو 2020 جىلى پرەزيدەنت سايلاۋىندا جەڭىسكە جەتتى دەپ حابارلانعان سوڭ ەلدە جاپپاي نارازىلىق باستالدى. سودان بەرى بيلىك 30 مىڭنان استام ادامدى ۇستاپ، جۇزدەگەن ادامدى ۇرىپ-سوقتى، جۋرناليستەردى قۋدالاي باستادى.
