26 naýryzda parlamentte jýrnalister suraǵyna jaýap bergen Qazaqstannyń qorǵanys ministriniń orynbasary Shaih-Hasan Jazyqbaev Batys Qazaqstan oblysy Jánibek aýdanynda “dronǵa uqsas zat” tabylǵanyn jáne bul oqiǵa boiynsha tergeý júrip jatqanyn aitty, dep habarlaidy Dalanews.kz.
Ol áýe qorǵanys kúshteri tergeý protsesine tartylǵanyn málimdedi, biraq basqa aqparat berýden bas tartty.
Qazaqstan aýmaǵyna áskeri drondardyń qulaýy birinshi ret emes ekenin aityp, onyń sebebi týraly suraǵan jýrnalistke Jazyqbaev: “Arandatýdyń qajeti joq” dep jaýap qatty.
“Bókei ordasy aýdanynda ne bar ekenin bilý kerek qoi. Múmkin, bul tehnikalyq aqaýdyń saldarynan syrtqa shyqqan bolar. Barlyǵyn tergeý nátijesi kórsetedi,” – dedi vitse-ministr.
Áskeri drondardyń qulaýy jurtty alańdatyp otyrǵanyn jáne qorǵanys ministrliginiń nege únsiz qalatynyn suraǵan jýrnalisterge Jazyqbaev: “Halyqty alańdamaýǵa shaqyramyn” dep jaýap berdi. Alaida, tergeý nátijesiniń qashan jariialanatynyn naqtylamady.
24 naýryzda Jánibek aýdanynda dron bólshekterine uqsas zattar tabylǵan. Biyl aqpan aiynan beri Batys Qazaqstan oblysynda osyndai úshinshi oqiǵa tirkelip otyr.
