Batys Qazaqstan oblysynda qazaq kinosynyń onkúndigi bastaldy. Shara aiasynda BQO turǵyndaryna otandyq kinonyń jetistigi men qazaqstandyq rejisserlerdiń týyndylary usynylatyn bolady. Mundaǵy árbir kinokartina memleket tarihyndaǵy negizgi kezeńderdi baiandap, kórnekti qoǵam qairatkerleriniń ómirin tanystyrmaq,- dep habarlaidy Dalanews.kz
Mańyzdy sharanyń ashylýyna Batys Qazaqstan oblysynyń ákimi Nariman Tóreǵaliev, Ulttyq kinony qoldaý memlekettik ortalyǵy Basqarma Tóraǵasynyń orynbasary Ádilet Omarov pen belgili rejisser Talǵat Temenov, aimaqtaǵy mádeniet salasynyń ókilderi men ziialy qaýym qatysty.
Sharada Batys Qazaqstan oblysynyń ákimi Nariman Tóreǵaliev otandyq kinematografiiany nasihattaý jónindegi jumystyń mańyzyn atap ótti:
«Memleket basshysy Qasym-Jomart Toqaev Ulttyq quryltaida kinoindýstriiany damytýdyń mańyzdylyǵyna erekshe nazar aýdarǵan bolatyn. Bul baǵyt – jas urpaqty ulttyq rýhta tárbieleý men qoǵamdyq sanany jańǵyrtýdyń mańyzdy tetigi. Óńirlerde memleket qarjylandyratyn filmderdi ulttyq kinony keńinen nasihattaýǵa kómektesedi».
Sonymen qatar Ulttyq kinony qoldaý memlekettik ortalyǵy Basqarma Tóraǵasynyń orynbasary Ádilet Omarov Kino kúnderi aiasynda usynylatyn filmderge toqtaldy.
«Búginde qazaqstandyq kino shyǵarmashylyq órleý kezeńin bastan keship jatyr. Mádeniet jáne aqparat ministrliginiń, sondai-aq ministr Aida Ǵalymqyzy Balaevanyń júieli qoldaýynyń arqasynda biz sapaly filmder túsirýmen qatar, ulttyq mádenietke qoljetimdilikti arttyrýdy jalǵastyrýdamyz. Tarih betterin ashyp kórsetetin kartinalar urpaqtar arasyndaǵy sabaqtastyqty nyǵaitýda, sondai-aq mádeni murany saqtaýda mańyzdy ról atqarady. Al Oral qalasynda onkúndiktiń ashylýy osy joldaǵy mańyzdy qadam.
Uly Otan soǵysyndaǵy Jeńistiń 80 jyldyǵyna orai qazaqtyń qaisar qyzdary Mánshúk Mámetova men Hiýaz Dospanovanyń týǵan jerinde biz aldymen «Qara qyz» kórkem filmin usynýdy jón taptyq. Budan bólek, qorjynymyzda taǵy birneshe film bar. Osylaisha, biz Ortalyqtyń qoldaýymen túsirilgen barlyq jobanyń kórermenge jetýin qalaimyz. Bul baǵytta oblys ortalyǵy ǵana emes, aýdan, aýyldar boiynsha arnaiy kórsetilim kestesi jasaldy, ákimdiktiń qoldaýymen birlese jumys júrgizetin bolamyz», – dedi Ádilet Omarov.
Otandyq kino onkúndiginiń birinshi kúni kórermenderge belgili rejisser Talǵat Temenovtyń «Qara qyz» filmi usynyldy. «Qara qyz» – qaharmandyq týraly film. Munda soǵys jyldarynyń shyndyǵymen qatar qan maidan ortasynda jankeshti erlik kórsetken batyrlarymyz ben tylda júrip qyrýar eńbek etken azamattardyń adami qundylyqtaryn baiandaidy.
«Soǵystyń qasireti, adamzat janyna salǵan jarasy eshqashan jazylmaq emes. Sol sekildi osynaý beibit ómirimiz úshin janyn berip, maidan dalasynda qyrshynnan qiylǵan bozdaqtardyń eren eńbegin de máńgilik jadymyzda saqtaý – paryzymyz. Al mundai filmderdi jer-jerde usyný oń bastama, ásirese jas urpaq muny kórse, ózgeshe oi túise deimiz», – dedi filmniń rejisseri.
Buǵan deiin Qazaq kinosynyń onkúndigi Qaraǵandy oblysynda bastalyp, Jambyl, SQO-da jalǵasyn tapty. Aldaǵy ýaqytta bul úrdis jalǵasyp, elimizdiń ózge qalalary men aýyldyq okrýgterinde de uiymdastyrylmaq. Shara aiasynda ártúrli janrdaǵy filmder usynylady. Jekelei jiktesek, «Jambyl. Jańa dáýir», «Dos-Muqasan» filmderi arqyly tulǵalarymyzdyń júrip ótken jolyna qanyǵýǵa bolady. Al «Baýyryna salý» dep atalatyn kinoda dástúrimiz dáriptelip, ultqa degen súiispenshilik sezimi eselenbek. Kishkentai kórermenderge «Taiqazan» dep atalatyn animatsiialyq týyndy kórsetiledi.
Aita keteiik, buǵan deiin Ulttyq kinony qoldaý memlekettik ortalyǵynyń qoldaýymen 117 kartinanyń óndirisi aiaqtaldy. Onyń 72-si – kórkem, 37-si – derekti, 8-i – animatsiialyq filmder.
