Halyqaralyq balalardy qorǵaý kúni qarsańynda elordaǵa elimizdiń barlyq óńirlerinen óz jetistikterimen erekshelengen balalar, balalar qozǵalysynyń kóshbasshylary jáne túrli jaǵdailarda adam ómirin arashalap qalǵan batyr balalar jinaldy. Olardyń árqaisysy joǵary baǵalanyp, QR Oqý-aǵartý ministrliginiń alǵys hatymen marapattaldy.
Oqý-aǵartý vitse-ministri Edil Ospan memleket tarapynan balalardyń qaýipsizdigi men jaily ortada ómir súrýi, bilim men tárbie alýy úshin barlyq jaǵdaidyń jasalyp otyrǵanyn aitty.
«Biyl biz Balalardy qorǵaý kúni qarsańynda dástúrli túrde talantymen daralanǵan jáne sheshýshi sátte batyrlyq tanytqan balalardy jinadyq. Memleketimizdiń, halqymyzdyń, ata-analaryńnyń úkilegen úmiti ózderiń. Búginde memleket balalarymyzdyń tárbielenýine, bilim alýyna jáne damýyna qolaily jaǵdai jasaýda. Óńirlerde mektepter, balabaqshalar, mádeni jáne sporttyq nysandar qurylysy qarqyndy júrýde, zańnamalyq baza jetildirilýde, pedagogterdiń biliktiligi arttyrylýda. Balalar - árqashan bizdiń qorǵaýymyzda. Tek bilim alýǵa, biik belesterdi baǵyndyrýǵa jáne adal, ádil tulǵa bolýǵa umtylý kerek, óitkeni elimizdiń bolashaǵy senderdiń qoldaryńda», - dep atap ótti Edil Ospan.
Kezdesý ári qarai ashyq dialog formatynda jalǵasty, onda balalar ózderi, otbasy, mekteptegi jetistikteri, qyzyǵýshylyqtary men armandary týraly aitty. «Bolashaqpen kezesý. Dialog s býdýshim» taqyrybyndaǵy is-sharaǵa Qazaqstan Respýblikasyndaǵy Bala quqyqtary jónindegi ýákil qatysty.
Ásirese, Astana qalasy men Qostanai oblysynan kelgen batyr balalar Aqan, Ramil, Matvei jáne Ivandy atap aitýǵa bolady. Jýyrda ǵana bul balalar órtenip jatqan úilerden adamdardy alyp shyǵyp, olardyń ómirin saqtap qaldy. Jas batyrlar men olardyń ata-analary QR Oqý-aǵartý ministriniń alǵys hattarymen marapattaldy.
«Ata-anam men ustazdaryma maǵan sińirgen tárbieleri úshin alǵysymydy bildiremin. Sondai-aq memleketke jáne Prezidentimizge bizge artqan senimi men qoldaýy úshin alǵys aitqym keledi», - deidi №31 mektep-gimnaziiasynyń 7 synyp oqýshysy Aqan Ákimjanov.
Kezdesý sońynda barlyq qatysýshylarǵa balalar saýyqtyrý ortalyǵyna joldamalar men syilyqtar tabystaldy, sondai-aq kóshbasshylyqty damytý boiynsha treningter ótkizilip, balalar ózara pikir almasyp, usynystarymen bólisti. Sondai-aq balalar Astananyń mádeni-demalys ortalyqtaryn aralady.
