Almaty oblysy ákiminiń baspasóz qyzmetiniń aqparaty boiynsha, kezdesý barysynda óńirde shaǵyn jáne orta biznesti qoldaý jónindegi memlekettik baǵdarlamalardy júzege asyrý máseleleri talqylanǵan, sondai-aq qordyń óńirlik filialynyń jańa basshysy tanystyryldy.
Qonaqtardy qarsy alyp, Amandyq Batalov ótken jyldyń qorytyndysy boiynsha qabyldanǵan sharalardyń arqasynda oblystyń jalpy óńirlik óniminiń kólemi 3 trln. teńgeden asyp túskenin, sonymen qatar ondaǵy ShOB úlesi 32%-dy quraǵanyn habarlady.
– «Damý» qory oblysta shaǵyn jáne orta biznesti damytý salasynda úlken qoldaý kórsetýde. Biz óz tarapymyzdan barlyq qajetti kómekti kórsetemiz. Biylǵy jyly shaǵyn jáne orta biznesti damytýǵa baǵyttalǵan «Jetisý» óńirlik baǵdarlamasyn birlesip iske asyrýǵa biýdjetten 500 mln.teńge bólinedi, – dedi Almaty oblysynyń ákimi Amandyq Batalov.
Óz kezeginde Gaýhar Bóribaeva qordyń óńirlik filialynyń jańa direktory Timýr Ikeevti tanystyra otyryp, qordyń aimaqtaǵy atqarǵan jumystary týraly aityp, osy saladaǵy jetken jetistikterimen bólisti. Sondai-aq, ol qor keńseleri Qarasai, Qaskeleń jáne Talǵar aýdandarynda ashylatynyn habarlady.
Kezdesýdi qorytyndylai kele, Amandyq Batalov halyqty jumyspen qamtamasyz etý – «Damý» kásipkerlikti damytý qorymen mańyzdy birlesken jumys atqaratyn mańyzdy mindetterdiń biri ekenin atap ótti.
Esterińizge sala keteiik, ótken jyldyń qorytyndysy boiynsha Almaty oblysynda ShOB sýbektileriniń sany 122 myńnan asty. Oblys kásipkerleri 11,8 mlrd teńgege memlekettik qoldaýǵa ie boldy. Jalpy óńirlik ónimdegi ShOB úlesi 32%-ǵa deiin jetkizilgen.
Anar SABYROVA, Almaty oblysy.
