Atyraýda Jangeldin aýylyndaǵy otbasynyń ólimine qatysty sot protsesi jalǵasyp jatyr. Kezekti otyrysta marqumdardyń týystary joǵalǵan adamdardyń atynan kelgen habarlamalarǵa qalai kúdiktene bastaǵanyn aityp berdi, dep habarlaidy dalanews.kz.
Búgin Atyraý oblysynyń qylmystyq ister jónindegi mamandandyrylǵan aýdanaralyq sotynda Sultan Sársemálievke qatysty is boiynsha kýágerlerden jaýap alý jalǵasty.
Sotta marqum Maqsot Qarabalinniń nemere qaryndasy Parizat Kenjeǵalieva jaýap berdi. Onyń aitýynsha, ótken jyldyń 12 qarashasynda ol aǵasynyń maly men múlki satylyp jatqanyn estip, úiine barǵan. Sol jerde maldy tiep jatqan adamdardy kórip, satylymdy toqtatýǵa tyrysqan.
Kýáger bul jaǵdai týraly Naýryz Muqanǵalievtiń WhatsApp nómirinen kelgen habarlamalar arqyly bilgenin aitty. Bastapqyda ol hattardy basqa bireý jazyp otyr dep kúdiktenbegen.
Parizat Kenjeǵalieva úi ieleri joq kezde olardyń múlki men malyn satýǵa úzildi-kesildi qarsy bolǵan. Osydan keiin ol Naýryzǵa birneshe ret videoqońyraý shalmaq bolǵanymen, qońyraýlarǵa eshkim jaýap bermegen.
Sotta jaýap berý kezinde kýáger emotsiiasyn jasyra almady.
"Ol ólgen adamdy tiriltkendei áreket jasaǵan", – dedi Parizat Kenjeǵalieva.
Keiin ol Sultan Sársemálievke qarata:
"Olardyń kinási ne edi? Basyńdy kóter!" – dedi.
Osydan keiin sýdia kýágerge eskertý jasady.
Parizat Kenjeǵalievanyń aitýynsha, marqumdardyń otbasynda eshqandai qaryz bolmaǵan. Olar óz eńbegimen kún kórgen. Osy sózderdi aitqan kezde áiel kóz jasyna erik berdi.
