Атырауда Жангелдин ауылындағы отбасының өліміне қатысты сот процесі жалғасып жатыр. Кезекті отырыста марқұмдардың туыстары жоғалған адамдардың атынан келген хабарламаларға қалай күдіктене бастағанын айтып берді, деп хабарлайды dalanews.kz.
Бүгін Атырау облысының қылмыстық істер жөніндегі мамандандырылған ауданаралық сотында Сұлтан Сәрсемәлиевке қатысты іс бойынша куәгерлерден жауап алу жалғасты.
Сотта марқұм Мақсот Қарабалиннің немере қарындасы Паризат Кенжеғалиева жауап берді. Оның айтуынша, өткен жылдың 12 қарашасында ол ағасының малы мен мүлкі сатылып жатқанын естіп, үйіне барған. Сол жерде малды тиеп жатқан адамдарды көріп, сатылымды тоқтатуға тырысқан.
Куәгер бұл жағдай туралы Наурыз Мұқанғалиевтің WhatsApp нөмірінен келген хабарламалар арқылы білгенін айтты. Бастапқыда ол хаттарды басқа біреу жазып отыр деп күдіктенбеген.
Паризат Кенжеғалиева үй иелері жоқ кезде олардың мүлкі мен малын сатуға үзілді-кесілді қарсы болған. Осыдан кейін ол Наурызға бірнеше рет видеоқоңырау шалмақ болғанымен, қоңырауларға ешкім жауап бермеген.
Сотта жауап беру кезінде куәгер эмоциясын жасыра алмады.
"Ол өлген адамды тірілткендей әрекет жасаған", – деді Паризат Кенжеғалиева.
Кейін ол Сұлтан Сәрсемәлиевке қарата:
"Олардың кінәсі не еді? Басыңды көтер!" – деді.
Осыдан кейін судья куәгерге ескерту жасады.
Паризат Кенжеғалиеваның айтуынша, марқұмдардың отбасында ешқандай қарыз болмаған. Олар өз еңбегімен күн көрген. Осы сөздерді айтқан кезде әйел көз жасына ерік берді.
