اتىراۋدا جانگەلدين اۋىلىنداعى وتباسىنىڭ ٶلٸمٸنە قاتىستى سوت پروتسەسٸ جالعاسىپ جاتىر. كەزەكتٸ وتىرىستا مارقۇمداردىڭ تۋىستارى جوعالعان ادامداردىڭ اتىنان كەلگەن حابارلامالارعا قالاي كٷدٸكتەنە باستاعانىن ايتىپ بەردٸ, دەپ حابارلايدى dalanews.kz.
بٷگٸن اتىراۋ وبلىسىنىڭ قىلمىستىق ٸستەر جٶنٸندەگٸ مامانداندىرىلعان اۋدانارالىق سوتىندا سۇلتان سەرسەمەليەۆكە قاتىستى ٸس بويىنشا كۋەگەرلەردەن جاۋاپ الۋ جالعاستى.
سوتتا مارقۇم ماقسوت قاراباليننٸڭ نەمەرە قارىنداسى پاريزات كەنجەعاليەۆا جاۋاپ بەردٸ. ونىڭ ايتۋىنشا, ٶتكەن جىلدىڭ 12 قاراشاسىندا ول اعاسىنىڭ مالى مەن مٷلكٸ ساتىلىپ جاتقانىن ەستٸپ, ٷيٸنە بارعان. سول جەردە مالدى تيەپ جاتقان ادامداردى كٶرٸپ, ساتىلىمدى توقتاتۋعا تىرىسقان.
كۋەگەر بۇل جاعداي تۋرالى ناۋرىز مۇقانعاليەۆتٸڭ WhatsApp نٶمٸرٸنەن كەلگەن حابارلامالار ارقىلى بٸلگەنٸن ايتتى. باستاپقىدا ول حاتتاردى باسقا بٸرەۋ جازىپ وتىر دەپ كٷدٸكتەنبەگەن.
پاريزات كەنجەعاليەۆا ٷي يەلەرٸ جوق كەزدە ولاردىڭ مٷلكٸ مەن مالىن ساتۋعا ٷزٸلدٸ-كەسٸلدٸ قارسى بولعان. وسىدان كەيٸن ول ناۋرىزعا بٸرنەشە رەت ۆيدەوقوڭىراۋ شالماق بولعانىمەن, قوڭىراۋلارعا ەشكٸم جاۋاپ بەرمەگەن.
سوتتا جاۋاپ بەرۋ كەزٸندە كۋەگەر ەموتسيياسىن جاسىرا المادى.
"ول ٶلگەن ادامدى تٸرٸلتكەندەي ەرەكەت جاساعان", – دەدٸ پاريزات كەنجەعاليەۆا.
كەيٸن ول سۇلتان سەرسەمەليەۆكە قاراتا:
"ولاردىڭ كٸنەسٸ نە ەدٸ? باسىڭدى كٶتەر!" – دەدٸ.
وسىدان كەيٸن سۋديا كۋەگەرگە ەسكەرتۋ جاسادى.
پاريزات كەنجەعاليەۆانىڭ ايتۋىنشا, مارقۇمداردىڭ وتباسىندا ەشقانداي قارىز بولماعان. ولار ٶز ەڭبەگٸمەن كٷن كٶرگەن. وسى سٶزدەردٸ ايتقان كەزدە ەيەل كٶز جاسىنا ەرٸك بەردٸ.
