Biylǵy jyldyń alǵashqy jartysynda elimizde 70 myńnan astam páter salyndy. Bul — turǵyn úi qurylysy boiynsha rekordtyq kórsetkish. Alaida qurylys qarqyny joǵary bolǵanymen, baspana baǵasy tómendemei tur. Sebebi turǵyn úige suranys áli de joǵary, al halyqtyń satyp alý múmkindigi shekteýli, dep habarlaidy Dalanews.kz 31 arnaǵa silteme jasap.
Jańa úilerdiń kóptep salynyp jatqanyna qaramastan, baspana baǵasy sharyqtap tur. Máselen, maýsym aiynda bastapqy turǵyn úi baǵasy bir jylda 9,5 paiyzǵa ósken. Shymkentte – 16%, Almatyda – 15%, al elordada – 6%-ǵa jýyq qymbattaǵan. Qazir respýblika boiynsha bir sharshy metrdiń ortasha quny — 527 myń teńge. Byltyr bul baǵa 488 myń teńge edi.
Sarapshylardyń aitýynsha, qurylys kólemi artqanymen, suranys odan da joǵary. Al halyqtyń tólem qabileti shegine jetken. Páter alý jónindegi kelisimsharttar azaiǵan. Jáne bul jaǵdai jyldyń sońyna deiin aitarlyqtai ózgermeidi.
“Ai saiyn 45 myń satyp alý-satý kelisimin jasaý mejesine jete almaimyz. Sebebi aimaqtarda belsendilik 20 paiyzǵa, tipti odan da kópke tómendedi. Al iri qalalarda bul kórsetkish ózgermeli kúide tur”, – deidi jyljymaityn múlik naryǵynyń sarapshysy Aleksandr Pak.
Kóptegen qazaqstandyq jańa ipotekalyq baǵdarlamalarǵa úmit artyp otyr. Alaida mamandar aldaǵy jyldary ipoteka sharttary da qoljetimsiz bola túsedi dep boljaidy.
“Kelesi jyldan bastap baǵaǵa QQS-tyń ósýi, zańnamadaǵy ózgerister men dollar baǵamynyń qymbattaýy áser etedi. Sonyń saldarynan qurylys quny da artady. Óitkeni ár sharshy metrdiń 50 paiyzy shetelden jetkiziletin materialdardan turady”, – deidi halyqaralyq jyljymaityn múlik sarapshysy Lev Tetin.
Sarapshylardyń boljamynsha, 2025 jyldyń sońyna deiin páter baǵasy taǵy 12–15 paiyzǵa ósýi múmkin.
