بيىلعى جىلدىڭ العاشقى جارتىسىندا ەلىمىزدە 70 مىڭنان استام پاتەر سالىندى. بۇل — تۇرعىن ءۇي قۇرىلىسى بويىنشا رەكوردتىق كورسەتكىش. الايدا قۇرىلىس قارقىنى جوعارى بولعانىمەن، باسپانا باعاسى تومەندەمەي تۇر. سەبەبى تۇرعىن ۇيگە سۇرانىس ءالى دە جوعارى، ال حالىقتىڭ ساتىپ الۋ مۇمكىندىگى شەكتەۋلى، دەپ حابارلايدى Dalanews.kz 31 ارناعا سىلتەمە جاساپ.
جاڭا ۇيلەردىڭ كوپتەپ سالىنىپ جاتقانىنا قاراماستان، باسپانا باعاسى شارىقتاپ تۇر. ماسەلەن، ماۋسىم ايىندا باستاپقى تۇرعىن ءۇي باعاسى ءبىر جىلدا 9،5 پايىزعا وسكەن. شىمكەنتتە – 16%، الماتىدا – 15%، ال ەلوردادا – 6%-عا جۋىق قىمباتتاعان. ءقازىر رەسپۋبليكا بويىنشا ءبىر شارشى مەتردىڭ ورتاشا قۇنى — 527 مىڭ تەڭگە. بىلتىر بۇل باعا 488 مىڭ تەڭگە ەدى.
ساراپشىلاردىڭ ايتۋىنشا، قۇرىلىس كولەمى ارتقانىمەن، سۇرانىس ودان دا جوعارى. ال حالىقتىڭ تولەم قابىلەتى شەگىنە جەتكەن. پاتەر الۋ جونىندەگى كەلىسىمشارتتار ازايعان. جانە بۇل جاعداي جىلدىڭ سوڭىنا دەيىن ايتارلىقتاي وزگەرمەيدى.
“اي سايىن 45 مىڭ ساتىپ الۋ-ساتۋ كەلىسىمىن جاساۋ مەجەسىنە جەتە المايمىز. سەبەبى ايماقتاردا بەلسەندىلىك 20 پايىزعا، ءتىپتى ودان دا كوپكە تومەندەدى. ال ءىرى قالالاردا بۇل كورسەتكىش وزگەرمەلى كۇيدە تۇر”، – دەيدى جىلجىمايتىن مۇلىك نارىعىنىڭ ساراپشىسى الەكساندر پاك.
كوپتەگەن قازاقستاندىق جاڭا يپوتەكالىق باعدارلامالارعا ءۇمىت ارتىپ وتىر. الايدا ماماندار الداعى جىلدارى يپوتەكا شارتتارى دا قولجەتىمسىز بولا تۇسەدى دەپ بولجايدى.
“كەلەسى جىلدان باستاپ باعاعا ققس-تىڭ ءوسۋى، زاڭناماداعى وزگەرىستەر مەن دوللار باعامىنىڭ قىمباتتاۋى اسەر ەتەدى. سونىڭ سالدارىنان قۇرىلىس قۇنى دا ارتادى. ويتكەنى ءار شارشى مەتردىڭ 50 پايىزى شەتەلدەن جەتكىزىلەتىن ماتەريالداردان تۇرادى”، – دەيدى حالىقارالىق جىلجىمايتىن مۇلىك ساراپشىسى ليەۆ تەتين.
ساراپشىلاردىڭ بولجامىنشا، 2025 جىلدىڭ سوڭىنا دەيىن پاتەر باعاسى تاعى 12–15 پايىزعا ءوسۋى مۇمكىن.
