Kúni keshe oppozitsiialyq jýrnalist Aidos Sadyqovqa Kievtegi úiiniń aýlasynda qastandyq jasaldy. Áieli Natalia Sadyqova ekeýi otyrǵan kólik jaqqa belgisiz bireý kelip, jýrnaliske oq atqan. Saldarynan Sadyqov jaraqat alyp, qazirgi tańda aýyr jaǵdaida jatyr. Áleýmettik jelide Aidos Sadyqovqa qastandyq jasaýǵa qazaq biligi tapsyrys bergen degen aqparat jeldei esip júr. Jýrnalistiń áieli Natalia Sadyqova da solai esepteidi. Sarapshylar bul jaily ne deidi? Dalanews.kz tilshisi sholý jasady.
"Baraeva" telegram arnasyndaǵy málimet boiynsha, jýrnaliske qastandyq jasalardan birneshe kún buryn anonimder Aidos pen Natalianyń buǵattalǵan akkaýnttaryndaǵy materialdardy jariialaýdy suraǵan kórinedi.
"Materialdar shynaiy, onyń ishinde, intim materialdar da bar. Áldekim erli-zaiyptynyń ainalasynda janjal týdyrǵysy kelgen siiaqty. Qastandyq jasalǵan kúni Sadyqovtardyń kanalynda Toqaevtyń ainalasyndaǵy "Kreml agentteri" týraly video paida boldy. Natalia qastandyqty qazaq biligi jasady dep esepteidi. Eger munyń bári bolmaǵanda Aidosqa jasalǵan qastandyqty turmystyq oqiǵa dep esepteýge bolar edi. Biraq bul oqiǵa tym saiasilandyrylyp ketken sekildi", - dep jazylǵan Baraeva kanalynda.
Otandyq saiasattanýshy Ǵaziz Ábishev te Sadyqovqa jasalǵan qastandyqqa qazaq biliginiń qatysy bar degen aqparatqa qatysty oiyn aitty.
"Aq-Ordanyń qatysy bar dei salý óte yńǵaily. Biraq bul tusta birneshe suraq týyndaidy. Sadyqovqa qastandyq jasaý Qazaqstan biligine qandai paida ákeledi? "Base" – tanymal, biraq qarapaiym oppozitsiialyq kanal. Bárine belgili ideiany talqylap, eldegi jaǵdaiǵa aýyz toltyryp aitarlyqtai áser ete qoimaityn kanal. Basqa eldiń aýmaǵyndaǵy osyndai qastandyq qadamy halyqaralyq etikalyq normalardy óreskel buzý bolyp sanalady, olardyń saqtalýyn Qazaqstan muqiiat qadaǵalap otyrady.
Ýkrainalyq arnaiy qyzmetter batystyń arnaiy qyzmetiniń kómegimen ásirese Kievte barlaý kordondaryn salǵan. Bireý olardyń aldyn orap ketken. Ony Qazaqstan istedi dep sanaý – demek qazaqtyń kúshtik apparaty soǵysyp jatqan Ýkrainanyń aýmaǵyna erkin kirip ketedi degenge senýmen birdei. Bul jerde de kúmán týdyratyn suraqtar bar. Jalpy jaǵdai mynandai: barlyq tustan aqparattyq shabýyl jasalyp jatqan, sanktsiiaǵa ushyraýy múmkin Qazaqstan aiaq asty jelidegi avtordyń biriniń kózin joiýdy sheshedi eken, ol úshin soǵys territoriiasynda turǵan elde qastandyq uiymdastyrypty-mys. Saiasi turǵyda kelispeitin tustar bar. Biraq tergeý nátijesin kútý kerek", - deidi Ábishev.
Al "Chemodan gossekretov" telegram arnasyndaǵy sarapshylar túrli oppozitsiialyq kanaldar Sadyqovqa jasalǵan qastandyqty Astananyń moinyna ilip qoimaq ekenin aitady.
"Al shyn máninde "Base" kanalyn qazir eshkim qaýipti kanal retinde qarastyrmaidy: olarda aqparat ta, eldiń ishki jaǵdaiyna áseri de joq. Sadyqovtyń rýsofobtyǵyn eskersek, qastandyq jasaý tek Kremlge tiimdi. Qastandyq jasaý Aqordaǵa tiimsiz: "Base" kanalyna qajetsiz kóńil bóline bastaidy, úlken kúsh-jigerdi talap etedi jáne resmi Astananyń is-qimyl qaǵidatyna sáikes kelmeidi. Sadyqovqa jasalǵan qastandyq benefitsiarlarynyń tizimi belgili: olar Qazaqstandy Batyspen de, Reseimen de arazdastyrýdy oilap otyr", - deidi kanal sarapshylary.
Buǵan deiin Ýkrainanyń Bas prokýratýrasy Sadyqovqa jasalǵan qastandyqqa bailanysty sotqa deiingi tergeý amaldary bastalǵanyn habarlaǵan edi.
Aita keteiik, Aidos Sadyqov Ýkrainada resmi bosqyn mártebesin alǵan. 2023 jyldyń qazan aiynda Sadyqovqa Qazaqstanda "áleýmettik, ulttyq, rýlyq, tektik-toptyq nemese dini alaýyzdyqty qozdyrǵany" úshin izdeý jariialanǵan bolatyn.
