Bas prokýratýra Qyzylorda oblysynda eki prokýratýra qyzmetkeriniń ustalǵany jónindegi aqparatqa túsinikteme berdi, dep habarlaidy Dalanews.kz Tengrinews.kz-ke siltep.
Buǵan deiin áleýmettik jelide UQK Qyzylorda oblysynda prokýratýra organdarynyń eki qyzmetkerin ustaǵany týraly aqparat taraǵan edi. Belgili bolǵandai, olardyń biri — Qyzylorda oblysy prokýratýrasynyń qyzmetkeri — esirtki zattarynyń zańsyz ainalymyna qatysy bar degen kúdikke ilingen. Ekinshi adam — Ulytaý oblysynyń prokýrory degen boljam bar — ol qylmystyq isti sheshýge kómekteskeni úshin bir million teńge para alǵan degen kúdikke ilikken.
Redaktsiianyń saýalyna jaýap bergen Bas prokýratýra kúdikti dep tanylǵan adamnyń ustalǵan sátte quqyq qorǵaý organdarynyń qyzmetkeri bolmaǵanyn habarlady.
«Sonymen qatar, Qyzylorda oblysy boiynsha UQKD men Bas prokýratýranyń Ishki qaýipsizdik departamenti birlesip júrgizgen jedel is-sharalar nátijesinde Ulytaý oblysynda Qylmystyq kodekstiń 190-baby («Alaiaqtyq») boiynsha sotqa deiingi tergeý tirkeldi. Qylmystyq-protsestik kodekstiń 201-babyna sáikes, basqa aqparat jariia etilmeidi», – dep málimdedi vedomstvo.
