Qańtar oqiǵasy kezinde ustalyp, keiin bosap shyqqan qyrǵyz mýzykanty Vikram Rýzahýnovqa qatysty isti Bas prokýratýra tergep jatyr, - dep habarlaidy Dalanews.kz.
"Bas prokýratýranyń sotqa deiingi tergeý qyzmeti Rýzahýnov V. men basqa da azamattar jábirlenýshi dep tanylǵan qylmystyq isti tergeýge qabyldaǵanyn rastaimyz", - dep jazylǵan "Azattyqqa" resmi jaýapta.
Mekeme qansha kúdikti ustalǵanyn, jábirlenýshi dep tanylǵan adam sanyn, olardyń azamattyǵy týraly aitpaǵan.
"Qazir tergeý jalǵasyp jatyr. Tergeý múddesine sáikes basqa málimetterdi jariia etýge bolmaidy jáne ol jurtqa qylmystyq iske qatysýshylardyń quqyǵy men zańdy múddelerin eskerip, jetkiziletin bolady", - dep jazǵan Bas prokýratýra ókilderi "Azattyqqa".
Aita keteiik, buǵan deiin mýzykanttyń ózi de is Qazaqstan Respýblikasynyń Bas prokýratýrasyna joldanǵanyn málimdegen edi.
"Osy qurylymnyń eki qyzmetkeri bastalǵan isti sońyna deiin jetkizý úshin Astanadan Almatyǵa arnaiy issaparmen jiberildi.
Qazir buryn anyqtalǵan politsiia qyzmetkerleriniń tórteýi ustaldy jáne qamaýǵa alyndy (olardyń biri azaptaý men zorlyq-zombylyq deregin moiyndady, ekinshisi ótirik aqparattar jariialaý úshin blogerler men jýrnalisterdi jaldady)", - dedi ol áleýmettik jelide.
Onyń sózinshe, qazir jábirlenýshiler qatary kóbeigen.
"Adamdardyń sanasy birtindep oianyp jatyr, jábirlenýshiler qatarynda qazir 22 adam bar. Olar - menimen birge quqyq qorǵaý organdarynyń qatygezdigi men qorlyǵyna ushyraǵandar, bir ýaqytta, bir jerde. ...Bas prokýratýra bul isti aiaqtaitynyna sendirdi, al alǵashqy 4 qylmyskerdi ustaý - tek bastamasy.
Eshkim jaýapkershilikten qashyp qutylmaidy! Azaptaý, zorlyq-zombylyqqa jol joq!!! ... Tergeý jalǵasyp jatyr", - dedi ol.
Buǵan deiin Almatydaǵy politsiiada azaptalǵanyn málimdegen tanymal qyrǵyz mýzykanty Vikram Rýzahýnov videoúndeý jariialady. Áleýmettik jelilerde taralǵan videoda ol ádilet úshin kúresetinin aitqan edi.
"Uzaq oilandym. Mýzyka men kásipke eshteńe bolmaǵandai orala almaitynymdy túsindim. TMD elderindegi demokratiiany damytýǵa, adam quqyqtaryna qatysty jaǵdaidy jaqsartýǵa úles qosqym keledi", – dedi mýzykant.
Rýzahýnovqa qyrǵyz zańgerleri kómektesetini belgili boldy. 10 aqpanda ol Qazaqstandaǵy politsiia kúshteri ózin azaptaǵanyn aitqan. Rýzahýnovtyń málimdeýinshe, ol jeltoqsannyń aiaǵynda Almatyǵa kelip, 7 qańtarda eline qaityp bara jatqan ýaqytta ustalǵan. Onyń qujattaryn, bank kartalaryn, aqshasyn tartyp alǵan.
Úsh kún qamaýda bolǵan qyrǵyz mýzykanty sol jyly 10 qańtarda Qyrǵyzstanǵa qaitaryldy. Bet-aýzy kógergen Rýzahýnov Bishkekke jetken bette aýrýhanaǵa tústi.
Qazaqstandaǵy qańtar oqiǵasy kezinde eki qyrǵyz azamaty qaza tapqan. Onǵa jýyq qyrǵyzstandyq qamaýdan bosatyldy.
