Қаңтар оқиғасы кезінде ұсталып, кейін босап шыққан қырғыз музыканты Викрам Рузахуновқа қатысты істі Бас прокуратура тергеп жатыр, - деп хабарлайды Dalanews.kz.
"Бас прокуратураның сотқа дейінгі тергеу қызметі Рузахунов В. мен басқа да азаматтар жәбірленуші деп танылған қылмыстық істі тергеуге қабылдағанын растаймыз", - деп жазылған "Азаттыққа" ресми жауапта.
Мекеме қанша күдікті ұсталғанын, жәбірленуші деп танылған адам санын, олардың азаматтығы туралы айтпаған.
"Қазір тергеу жалғасып жатыр. Тергеу мүддесіне сәйкес басқа мәліметтерді жария етуге болмайды және ол жұртқа қылмыстық іске қатысушылардың құқығы мен заңды мүдделерін ескеріп, жеткізілетін болады", - деп жазған Бас прокуратура өкілдері "Азаттыққа".
Айта кетейік, бұған дейін музыканттың өзі де іс Қазақстан Республикасының Бас прокуратурасына жолданғанын мәлімдеген еді.
"Осы құрылымның екі қызметкері басталған істі соңына дейін жеткізу үшін Астанадан Алматыға арнайы іссапармен жіберілді.
Қазір бұрын анықталған полиция қызметкерлерінің төртеуі ұсталды және қамауға алынды (олардың бірі азаптау мен зорлық-зомбылық дерегін мойындады, екіншісі өтірік ақпараттар жариялау үшін блогерлер мен журналистерді жалдады)", - деді ол әлеуметтік желіде.
Оның сөзінше, қазір жәбірленушілер қатары көбейген.
"Адамдардың санасы біртіндеп оянып жатыр, жәбірленушілер қатарында қазір 22 адам бар. Олар - менімен бірге құқық қорғау органдарының қатыгездігі мен қорлығына ұшырағандар, бір уақытта, бір жерде. ...Бас прокуратура бұл істі аяқтайтынына сендірді, ал алғашқы 4 қылмыскерді ұстау - тек бастамасы.
Ешкім жауапкершіліктен қашып құтылмайды! Азаптау, зорлық-зомбылыққа жол жоқ!!! ... Тергеу жалғасып жатыр", - деді ол.
Бұған дейін Алматыдағы полицияда азапталғанын мәлімдеген танымал қырғыз музыканты Викрам Рузахунов видеоүндеу жариялады. Әлеуметтік желілерде таралған видеода ол әділет үшін күресетінін айтқан еді.
"Ұзақ ойландым. Музыка мен кәсіпке ештеңе болмағандай орала алмайтынымды түсіндім. ТМД елдеріндегі демократияны дамытуға, адам құқықтарына қатысты жағдайды жақсартуға үлес қосқым келеді", – деді музыкант.
Рузахуновқа қырғыз заңгерлері көмектесетіні белгілі болды. 10 ақпанда ол Қазақстандағы полиция күштері өзін азаптағанын айтқан. Рузахуновтың мәлімдеуінше, ол желтоқсанның аяғында Алматыға келіп, 7 қаңтарда еліне қайтып бара жатқан уақытта ұсталған. Оның құжаттарын, банк карталарын, ақшасын тартып алған.
Үш күн қамауда болған қырғыз музыканты сол жылы 10 қаңтарда Қырғызстанға қайтарылды. Бет-аузы көгерген Рузахунов Бішкекке жеткен бетте ауруханаға түсті.
Қазақстандағы қаңтар оқиғасы кезінде екі қырғыз азаматы қаза тапқан. Онға жуық қырғызстандық қамаудан босатылды.
