قاڭتار وقيعاسى كەزىندە ۇستالىپ، كەيىن بوساپ شىققان قىرعىز مۋزىكانتى ۆيكرام رۋزاحۋنوۆقا قاتىستى ءىستى باس پروكۋراتۋرا تەرگەپ جاتىر، - دەپ حابارلايدى Dalanews.kz.

"باس پروكۋراتۋرانىڭ سوتقا دەيىنگى تەرگەۋ قىزمەتى رۋزاحۋنوۆ ۆ. مەن باسقا دا ازاماتتار جابىرلەنۋشى دەپ تانىلعان قىلمىستىق ءىستى تەرگەۋگە قابىلداعانىن راستايمىز"، - دەپ جازىلعان "ازاتتىققا" رەسمي جاۋاپتا.

مەكەمە قانشا كۇدىكتى ۇستالعانىن، جابىرلەنۋشى دەپ تانىلعان ادام سانىن، ولاردىڭ ازاماتتىعى تۋرالى ايتپاعان.

"ءقازىر تەرگەۋ جالعاسىپ جاتىر. تەرگەۋ مۇددەسىنە سايكەس باسقا مالىمەتتەردى جاريا ەتۋگە بولمايدى جانە ول جۇرتقا قىلمىستىق ىسكە قاتىسۋشىلاردىڭ قۇقىعى مەن زاڭدى مۇددەلەرىن ەسكەرىپ، جەتكىزىلەتىن بولادى"، - دەپ جازعان باس پروكۋراتۋرا وكىلدەرى "ازاتتىققا".

ايتا كەتەيىك، بۇعان دەيىن مۋزىكانتتىڭ ءوزى دە ءىس قازاقستان رەسپۋبليكاسىنىڭ باس پروكۋراتۋراسىنا جولدانعانىن مالىمدەگەن ەدى.

"وسى قۇرىلىمنىڭ ەكى قىزمەتكەرى باستالعان ءىستى سوڭىنا دەيىن جەتكىزۋ ءۇشىن استانادان الماتىعا ارنايى ىسساپارمەن جىبەرىلدى.

ءقازىر بۇرىن انىقتالعان پوليسيا قىزمەتكەرلەرىنىڭ تورتەۋى ۇستالدى جانە قاماۋعا الىندى (ولاردىڭ ءبىرى ازاپتاۋ مەن زورلىق-زومبىلىق دەرەگىن مويىندادى، ەكىنشىسى وتىرىك اقپاراتتار جاريالاۋ ءۇشىن بلوگەرلەر مەن جۋرناليستەردى جالدادى)"، - دەدى ول الەۋمەتتىك جەلىدە.

ونىڭ سوزىنشە، ءقازىر جابىرلەنۋشىلەر قاتارى كوبەيگەن.

"ادامداردىڭ ساناسى بىرتىندەپ ويانىپ جاتىر، جابىرلەنۋشىلەر قاتارىندا ءقازىر 22 ادام بار. ولار - مەنىمەن بىرگە قۇقىق قورعاۋ ورگاندارىنىڭ قاتىگەزدىگى مەن قورلىعىنا ۇشىراعاندار، ءبىر ۋاقىتتا، ءبىر جەردە. ...باس پروكۋراتۋرا بۇل ءىستى اياقتايتىنىنا سەندىردى، ال العاشقى 4 قىلمىسكەردى ۇستاۋ - تەك باستاماسى.

ەشكىم جاۋاپكەرشىلىكتەن قاشىپ قۇتىلمايدى! ازاپتاۋ، زورلىق-زومبىلىققا جول جوق!!! ... تەرگەۋ جالعاسىپ جاتىر"، - دەدى ول.

بۇعان دەيىن الماتىداعى پوليسيادا ازاپتالعانىن مالىمدەگەن تانىمال قىرعىز مۋزىكانتى ۆيكرام رۋزاحۋنوۆ ۆيدەوۇندەۋ جاريالادى. الەۋمەتتىك جەلىلەردە تارالعان ۆيدەودا ول ادىلەت ءۇشىن كۇرەسەتىنىن ايتقان ەدى.

"ۇزاق ويلاندىم. مۋزىكا مەن كاسىپكە ەشتەڭە بولماعانداي ورالا المايتىنىمدى ءتۇسىندىم. تمد ەلدەرىندەگى دەموكراتيانى دامىتۋعا، ادام قۇقىقتارىنا قاتىستى جاعدايدى جاقسارتۋعا ۇلەس قوسقىم كەلەدى"، – دەدى مۋزىكانت.

رۋزاحۋنوۆقا قىرعىز زاڭگەرلەرى كومەكتەسەتىنى بەلگىلى بولدى. 10 اقپاندا ول قازاقستانداعى پوليسيا كۇشتەرى ءوزىن ازاپتاعانىن ايتقان. رۋزاحۋنوۆتىڭ مالىمدەۋىنشە، ول جەلتوقساننىڭ اياعىندا الماتىعا كەلىپ، 7 قاڭتاردا ەلىنە قايتىپ بارا جاتقان ۋاقىتتا ۇستالعان. ونىڭ قۇجاتتارىن، بانك كارتالارىن، اقشاسىن تارتىپ العان.

ءۇش كۇن قاماۋدا بولعان قىرعىز مۋزىكانتى سول جىلى 10 قاڭتاردا قىرعىزستانعا قايتارىلدى. بەت-اۋزى كوگەرگەن رۋزاحۋنوۆ بىشكەككە جەتكەن بەتتە اۋرۋحاناعا ءتۇستى.

قازاقستانداعى قاڭتار وقيعاسى كەزىندە ەكى قىرعىز ازاماتى قازا تاپقان. ونعا جۋىق قىرعىزستاندىق قاماۋدان بوساتىلدى.