Jýrnalist jáne qoǵam qairatkeri Dýman Muhamedkárimniń isin Bas prokýratýra qaita qaraidy. Bul týraly kinorejisser Erkin Raqyshev málimdedi, dep habarlaidy Dalanews.kz.
"Dýman Muhamedkárimniń ákesi Almas aǵamen (Almas Tileýov – red.) birge Bas prokýratýra basshylyǵymen kezdestik. Kezdesý barysynda Dýmandy jeti jylǵa dálelsiz sottaǵany týraly naqty derekterdi usyndyq. Bas qadaǵalaý organynyń basshylyǵy bul isti muqiiat tekserýge ýáde berdi", – dep jazdy Raqyshev áleýmettik jelidegi paraqshasynda.
Aita keteiik, Dýman Muhamedkárim 2023 jyly naýryzda májilis sailaýynyń nátijeleriniń burmalanýyna qarsy shyqqannan keiin qamaýǵa alyndy. Ol parlamenttik sailaý qorytyndylarymen kelispeitinin bildirip, mitingke shyǵatynyn málimdegeni úshin 25 táýlikke qamalǵan. Keiin, 1 mamyrda qaita ustalyp, "ekstremizmdi qarjylandyrý" isi boiynsha eki aiǵa qamaýǵa alyndy.
2023 jyly 15 shildede QazTAG agenttigi jýrnalistiń tergeý izoliatorynda densaýlyǵy nasharlaǵanyn habarlady. Al 2024 jylǵy 12 aqpanda Qonaev qalasynda onyń soty bastaldy. 26 aqpanda Muhamedkárim ózin azaptaǵanyn málimdese, 5 naýryzda QazTAG ony azaptaý isi boiynsha jábirlenýshi dep tanylǵanyn jazdy.
2024 jylǵy 2 tamyzda Qonaev qalasynyń soty Dýman Muhamedkárimdi "ekstremizmdi qarjylandyrý" jáne "tyiym salynǵan uiymnyń qyzmetine qatysý" baptary boiynsha jeti jylǵa bas bostandyǵynan aiyrdy.
