2025 jyly 17 qańtarda Memleket basshysy Qasym-Jomart Toqaev Bas prokýror Berik Asylovty qabyldady. Preident aldynda esep bergen Bas prokýror 81 myń kásipkerdiń buzylǵan quqyqtary qalpyna keltirilgenin aitty, dep jazady Dalanews.kz.
Asylovtyń aitýynsha, prokýratýra organdary sotqa deiingi tergeý satysynda 32 myńnan astam zańsyz sheshimdi toqtatqan, bul ister Qylmystyq-protsestik kodekske sai kelmeidi. 4 myń azamattyń qylmystyq iske negizsiz tartylýyna jol bermegen. Sonymen qatar zańsyz ustalǵan 1,5 myńnan asa adam bosatylǵan.
Bas prokýrordyń qarsylyǵy negizinde Joǵarǵy sot 150 tulǵaǵa qatysty istiń mán-jaiyn oń baǵytqa ózgertip, sonyń ishinde 10 adam tolyq aqtalǵan.
Asylov áleýmettik-ekonomikalyq salada 81 myń kásipkerdiń, 979 myń zeinetkerdiń, halyqtyń áleýmettik turǵydan az qamtylǵan toptarynyń jáne basqa da azamattardyń buzylǵan quqyqtary qalpyna keltirilgenin jetkizdi.
123 myń jumysshynyń eńbek quqyǵyn buzýǵa jol berilmegen. Jalpy somasy 4,5 milliard teńge bolatyn aliment boiynsha qaryz óndirilgen.
Bas prokýror byltyr memleket paidasyna 627 milliard teńgeden asatyn ótemaqy qaitarylǵany jóninde, ekonomikaǵa 12 trillion teńgeden astam qarjy quiǵan 800 investorǵa prokýrorlyq kómek berilgenin aitty:
- prokýratýra aktisi boiynsha 136 laýazymdy tulǵa jaýapqa tartylǵan;
- prokýrorlar investorlarǵa qatysty memlekettik organdardyń 712 sheshimine kelisim bermegen;
- investitsiialyq jobalarǵa qoldaý kórsetý barysynda "prokýrorlyq súzgini" paidalaný óz tiimdiligin kórsetken;
- jalpyulttyq pýlǵa engen jobalardyń júzege asyrylýyn qadaǵalaýǵa múmkindik beretin Tsifrly investitsiialyq platforma belsendi qyzmet atqaryp keledi.
Sondai-aq Berik Asylov qoǵam nazaryn aýdarǵan birqatar qylmystyq isti tergeý barysy jóninde málimet berip, qylmysqa qarsy kúreste tsifrlyq tehnologiialardy jappai engizý jóninde baiandady. Atap aitqanda, izdeýde júrgen azamattardy "aqyldy" beinekameranyń kómegimen tabý (izdeýde júrgender sany 9,4 paiyzǵa azaidy) tásili jolǵa qoiyldy.
Qasym-Jomart Toqaev "Zań jáne tártip" qaǵidasyn iske asyrý, barlyq salada zańnamanyń saqtalýyn qamtamasyz etý jumystaryn jalǵastyrýdy tapsyrdy. Sondai-aq alaiaqtyqqa qarsy is-qimyl, esirtki biznesimen kúres, qoǵamdyq oryndarda quqyqbuzýshylyqtyń aldyn alý boiynsha quqyq qorǵaý men basqa da memlekettik organdardyń qyzmetin úilestirýdiń mańyzyn atap ótti.
