Almaty oblysy ákiminiń aitýynsha, aýdanda 24 kásiporyn bolsa, sonyń 18-i óńdeýshi kásiporyndar, sonyń ishinde 15 naýbaihana, 2 balyq óńdeýshi, 1 bal óńdeýshi kásiporyn jumys isteidi.
Degenmen shikizat jetispeýshiligine bailanysty «Poliakov» kúnbaǵys maiyn shyǵarý tsehy, «Alakól-Nan» maily daqyldardy óńdeý tsehy, «Qaiyńdy» et óńdeý kesheni toqtap tur. Júktemesi azaiǵan kásiporyndar da bar. Sondyqtan daqyldar ónimdiligin arttyrý, toqtap turǵan kásiporyndardyń jumysyn jandandyrý jáne óndiris kólemin ulǵaitý sharalaryn jedel qolǵa alý qajet.
Ákim baiandamasynda aitylǵandai, Toqjailaý, Qońyr, Bibaqan, Keńes aýyldaryn ortalyq sýmen jabdyqtaý úshin JSQ ázirlenýde. Sondai-aq, Terekti, Lepsi, Kóktuma, Bulaqty aýyldaryndaǵy sý qubyry jelilerin qaita jańartý qujattaryn ázirleý jumystary bastaldy. Sonyń nátijesinde 4 aýyl ortalyq sý júiesimen qamtylyp, taǵy 4 aýylda aýyz sý sapasy jaqsarady. Joldardy jóndeýge de kóp kóńil bólinetin bolady.
Oblys basshysy óz sózinde Alakól kóliniń týristik áleýetine erekshe toqtaldy. Máselen, jazǵy maýsymnyń qorytyndysy boiynsha qosymsha aviareister men poiyzdar esebinen kól jaǵalaýyna 1 millionnan astam adam keldi.
– Jaǵalaýdy abattandyrý jumystaryn jalǵastyramyz. Sonyń ishinde Aqshi aýylynyń sýmen jabdyqtaý júiesi jańartylyp, salyndy. Jyl sońyna deiin Úsharal qalasy áýejaiynyń ushyp qoný jolaǵynyń, «Qabanbai-Kóktuma» avtojolynyń jóndeýi aiaqtalady. «Qazaqstantemirjolymen» «Talgo» júrdek poiyzyn júrgizý týraly memorandýmǵa qol qoidym. Bul reister jergilikti biýdjet esebinen sýbsidiialanatyn bolady, – dep atap ótti Q.Bozymbaev.
Sol siiaqty densaýlyq saqtaý, bilim beri, áleýmettik salalardyń jai-kúii de talqylandy. Máselen, meditsina salasynda sanitarlyq avtokólikpen qamtamasyz etýde, kadr tabý jaǵynan másáleler aýdanda áli de bar.
Bir qýanarlyǵy, Aqshi aýylyndaǵy «Jalyn» qala syrtyndaǵy lageri qaita jańartylýda. Nysan iske qosylǵanda oqýshylardyń súiikti demalys ornyna ainalady. Dostyq jáne Lepsinsk aýyldarynda dene shynyqtyrý-saýyqtyrý keshenderiniń qurylysy osy jyly aiaqtalady. Qurylysqa 1 mlrd teńge bólingen.
Alakól aýdanyna jasaǵan sapary kezinde Qanat Bozymbaev aýyl sharýashylyǵy, ónerkásip, densaýlyq saqtaý, sport, jol jáne kólik, kommýnaldyq sharýashylyq nysandaryn aralap, jumys barysymen tanysty.
Budan ári aýdan turǵyndarymen kezdesip, ashyq áńgime júrgizdi. Jiynda alakóldikter paidalanylmaǵan jerlerdi igerý, turǵyn úi qurylysyna, beton zaýytyn salýǵa jer ýchaskesin bólý, sýarmaly sý tapshylyǵy, kóldiń jaǵalaýyn bekitý, jaǵalaýdy tazalaý, jylý qazandyǵyn jóndeý, mal terisi men júnin óńdeitin kásiporyn ashý, Qabanbai aýylyna sport keshenin salý, Úsharal – Aqshi, Terekti – Taldybulaq jáne basqa da eldi mekender arasyndaǵy joldardy, kishi kópirlerdi jóndeý siiaqty ózekti máseleler kóterdi.
Kóktuma aýylynyń turǵyny jaǵalaýdy bekitý máselesine ererkshe toqtaldy.
– Kól jaǵalaýynyń 13 shaqyrymyn bekitý jumystary Kóktuma aýylynan 2020 jyly bastalǵan. Biraq qazir jumys toqtap tur. Bar jasalǵany 800 metr jer. Sonyń ishinde Kóktumaǵa tiesilisi 200 metr ǵana. Kóktuma aýylynyń Beregovoe kóshesin sý alyp ketti. Ekinshi kósheniń 500 metr jolyn sý alyp, baǵana qulap, aýyz sý jelisin de sý shaiyp ketti. Shyǵysqa shyǵatyn jol týpik bolyp qaldy. Jaǵalaýdy bekitý jumystaryn qaita qolǵa alsańyzdar eken, – dedi zeinetker aýyldastarynyń ótinishin jetkizip.
Qurylys basqarmasy basshysynyń jaýabyna qanaǵattanbaǵan oblys ákimi Qanat Bozymbaev 2 jylda nátije joq bolsa, onyń úsh sebebi bolýy múmkin ekenin aitty: ne memlekettik organ jobany durys daiyndamaǵan, ne qarjylandyrý kesheýildegen, ne merdigerdiń jaýapsyzdyǵynan oryn alyp otyr. Al merdiger jaýapsyz bolsa, kelisimshartty buzý qajet.
– Eń aldymen durys merdigerdi anyqtaý kerek. Mamyr aiy bastalýǵa jaqyn, al olar áli material daiyndap jatyr. Bulai bolmaidy, kelesi dúisenbide búkil qujattardy aldyma alyp kelip, jaǵdaidy baiandaisyz. Bul jumys meniń jeke baqylaýymda bolady» dedi Qanat Bozymbaev oblystyq qurylys basqarmasynyń basshysyna.
