Teledidar men gazetterde aityla-aityla aqjem, jaza-jaza jaýyr bolsa da, baiaǵy jartas - sol jartas. Tipti úirenip te kettik, keide kúlemiz. Sharasyzdyqtan kúletin shyǵarmyz... Depýtat bolyp kelgesin, birinshi kezekte osy máseleni qolǵa alyp jatyrmyz. Burynǵy áriptesterim bastaǵan jumysty jalǵastyrý jáne osy másele boiynsha arnaiy jumys tobyn basqarý ózime buiyrdy. Búgin jańa quramnyń alǵashqy otyrysy ótedi.
Kóshelerde tolyp turǵan qatelerdiń áli de durystalmaýynyń birneshe sebebi bar. Birinshiden, mundaǵy basty kemshilik - ana tilimizge nemquraily qaraý, esh jaýapkershiliksiz aýdarý, tilimizge jannyń ashymaýy. Ekinshiden, kórgen qateni jóndetýge aimaqtyq Tilderdi damytý basqarmalarynyń quzireti joq. Tek qana jarnama, kórneki aqparat emes, dári-dármek anyqtamasynyń, sol siiaqty ár saladaǵa kóptegen anyqtamalardyń durys aýdarylmaýy da - qazirgi qoǵamnyń «bas aýrýy». Al bul degenimiz tildiń ǵana emes, adamnyń ólimine de ákep soǵýy yqtimal.
«Táýelsizdik bárinen qymbat» atty maqalasynda Prezidentimiz Qasym-Jomart Toqaev «Elimizdiń basty nyshandarynyń biri – memlekettik til» ekenin basa aitty. Qudaiǵa shúkir, qazaq tilin meńgergen otandastarymyzdyń sany artyp keledi! Sondyqtan da memlekettik mekemelerdiń, eldi mekender men kóshe attaryn tek qazaq tilinde jazatyn ýaqyt keldi.
Áleýmettik-mádeni damý Komitetindegi áriptesterim Darhan Myńbai, Bekbolat Tleýhan, Aidos Sarym, Maqpal Tájmaǵambetova, jumys tobynyń músheleri Qazybek Isa, Janarbek Áshimjan, Iýrii Jýlin, jáne Baqytbek Smaǵul, Erlan Sairov, Natalia Dementeva, Gennadii Shipovskih, basqada áriptesterimmen birge osy máseleni durys jolǵa salamyz dep úmittenemin.
Berik ÁBDIǴALIULY,
QR Parlamenti májilisiniń depýtaty.
