Áleýmettik jelide Eski Qazaqstandy jaqtaýshylar belsendi bola bastady, - dep habarlaidy Dalanews.kz.
Eski Qazaqstandy jaqtaýshylar ásirese TikTok-ta belsendi jumys júrgize bastaǵan. Jelide taraǵan videolardyń mazmuny bir sarynda – Nazarbaev bilikte otyrǵan kezde halyqtyń jaǵdaiy jaqsy bolypty-mys.
Paraqshalarda Nazarbaevtyń halyqqa jaqsy kórinip qalǵan tustaryn, sheneýnikterdi sógip jatqan sátterin kórsetip, adamdarǵa psihologiialyq turǵyda áser etetin videolardy jariialai bastaǵan.
Sondai paraqshalardyń biri – «Elbasy Nazarbaev» dep atalǵan TikTok arna. Paraqshada qazirgi ýaqytta 98 myńǵa jýyq oqyrman bar. Videolar milliondap qaralym jinap úlgergen.
Paraqshadaǵy videolardyń birinde «halyq Nazarbaevqa shúkirshilik jasai almaǵany» aitylady.
«Qara sýmen júrgen halyqty balǵa jetkizip edi! Baryńdy baǵalai almadyńdar. Endi jarqyrap ómir súrgenderińdi kóreiik! Elbasym, seniń qadirińdi túsinbegen halyqtan ketkeniń de durys bolǵan-aý!», - deidi video avtory.
Bul videoǵa jazylǵan pikirler – «bottar armiiasynyń» jumysy tárizdi.
«Tek Qazaqstannyń emes, Álemniń kóshbasshysy»
«Atamyz qaityp kelse, eshkimnen qoryqpai ómir súremiz»
«Aman bolsyn, kóregen edi, báriniń aldyn alyp otyratyn edi» - degen syńaidaǵy pikirler kóptep jazylǵan.
Sonymen qatar, videoda «Zor patsha, siz ulyńyzdy patsha etińiz» degen pikirdi baiqap qaldyq. Bul Nazarbaevtyń uly Taýmannyń el aldynda kórine bastaýymen bailanysty bolýy múmkin.
Taǵy bir videoda qazirgi sý tasqynyna qatysty jaǵdai kórsetiledi. Video mazmuny boiynsha, «Nazarbaevtyń kezinde mundai jaǵdai bolmaǵan».
Jýrnalist Syrym Itqulovtyń sózinshe, Arystaǵy jarylys, shahtalardaǵy jarylys, Qańtar oqiǵasy sekildi aldymyzdan shyqqan problemalar áleýmettik ekonomikalyq turǵydan da, ideologiialyq turǵydan da quldyraý ekenin kórsetip otyr.
«Bul sol jumystardyń jemisi (naqty aitqanda jumys atqarylmaýynyń) – búgin aiaq asty saǵyna qalǵan, eldi 25 jyl basqarǵan biliktiń jumysy. (...) Qazirgi problemalardyń kontekstine qarasaq, olardyń sebebi de belgili: 30 jylda birde-bir damba salynbaǵan, TKSh men infraqurylymǵa investitsiia salynbaǵan», - deidi jýrnalist telegram arnasynda.
Odan bólek, «Elbasy ketkeli halyqtyń jaǵdaiy nasharlap ketken» degen mazmundaǵy video paida bolǵan. Munda da jazylǵan pikirler bottardyń jumysyna uqsaidy.
«Nazarbaevty qaitaryńdar dep mitingke shyǵamyz ba, ne isteimiz?»
«Altynnyń qolda barda qadiri bolmaidy degen sóz osyndaidan qalǵan-aý»
«Jaqsy edi Elbasymyz, qoimadyńdar «ket ket» dep, endi qadiri bilinip otyr», - degen pikirler jazylǵan.
Sonymen qatar, paraqshada Nazarbaevtyń kezindegi áielder quqyǵy jaily da aitylǵan. Paraqsha avtory eks-prezident tanymal qazaqstandyq áieldermen kezdesken sýretin jariialap, Nazarbaev áielderdiń quqyǵyn taptaǵan erkekterge aiaýshylyq tanytpaǵanyn jazǵan.
Bir apta buryn jariialanǵan bul jazba Qýandyq Bishimbaevtyń sot otyrysymen tuspa-tus kelgen.
Aita keteiik, eks-prezident Nursultan Nazarbaev 2019 jylǵy 19 naýryzda 2019 jylǵy 20 naýryzdan bastap prezidenttik ókilettigin óz qalaýymen ótkizetin qaýly qabyldady. Halyqqa úndeýinde Nazarbaev:
«Men Qazaqstan Respýblikasynyń prezidenti retinde ókilettigimdi toqtatý jóninde sheshim qabyldadym. Biyl elimizdiń eń joǵarǵy laýazymyndaǵy qyzmetin atqaryp kele jatqanyma otyz jyl tolady. Men Qazaqstan Respýblikasynyń prezidenti retinde ókilettigimdi toqtatý jóninde sheshim qabyldadym», – degen bolatyn.
