Atyraýda bir otbasynyń ólimine qatysty atyshýly sot protsesi jalǵasyp jatyr. Búgingi otyrysta aiyptalýshy Sultan Sársemáliev Naýryz Muqanǵaliev pen Meiramgúl Qarabalinanyń ólimine qatysty jaýap berdi, dep habarlaidy dalanews.kz.
Sot barysynda Naýryz Muqanǵalievtiń oqiǵa ornynda birden kóz jumbaǵany aityldy. Aiyptalýshynyń sózinshe, ol mundai jaǵdaiǵa ómirinde alǵash ret tap bolǵan.
"Naýryz birden qaitys bolǵan joq. Ómirimde birinshi ret osyndai jaǵdai boldy. Buryn mal da soiyp kórmegenmin", – dedi Sársemáliev.
Onyń aitýynsha, bolǵan oqiǵadan keiin ol biraz ýaqyt aýlada otyryp, ne isterin bilmei qalǵan. Keiin úige qaita kirgende Naýryzdyń edende jatqanyn kórgen.
Aiyptalýshy sol sátte marqum tiri qalýy múmkin dep oilaǵanyn, biraq keiin onyń bárin týystaryna aityp beredi dep qoryqqanyn jetkizdi. Sársemáliev politsiia shaqyrýdy da oilaǵanyn, alaida bes balasyn esine alyp, uzaq ýaqyt sheshim qabyldai almaǵanyn aitty.
Sotta ol Meiramgúl Qarabalinanyń ólimine qatysty da jaýap berdi. Aiyptalýshynyń sózinshe, Meiramgúl ata-anasy qaitys bolǵannan keiin Jangeldin aýylynan ákelinip, Aqbaianǵa kómektesý úshin úide bolǵan. Keiin ekeýiniń arasynda janjal shyqqan.
Sársemáliev Meiramgúldiń ózine aýyr sóz aitqanyn, sodan keiin ashýǵa erik bergenin málimdedi.
"Ol kezde eshqandai ókinish bolǵan joq. Úsh adamdy óltirgennen keiin báribir bolyp ketedi eken", – dedi aiyptalýshy sotta.
Is materialdarynda Meiramgúldiń ólimine buǵan deiin Mausot Qarabalin men Násip Muqanǵalievanyń qazasyna qoldanylǵan pyshaq paidalanylǵany kórsetilgen.
Aiyptalýshy qylmystan keiin Meiramgúldiń denesin Naýryz Muqanǵalievtiń máiiti jasyrylǵan jerge aparyp kómgenin aitty.
Eske salaiyq, buǵan deiin sotta Sársemálievtiń jubaiy Aqbaian Muqanǵalievanyń alǵashqy jaýabynyń beinejazbasy kórsetilgen edi. Onda ol bolǵan jaǵdaidy túsinbeitinin aitqan.
