Saltanatty sharaǵa QR Mádeniet jáne aqparat ministri Aida Balaeva, Parlament Májilisiniń depýtattary, QR Prezidenti janyndaǵy jastar saiasaty keńesiniń ókilderi, memleket jáne qoǵam qairatkerleri qatysty.
Aita keteiik, Memleket basshysy 2021 jyly «Táýelsizdik urpaqtary» grantyn jas qazaqstandyqtardyń jańa jáne qoldanystaǵy bastamalaryn qoldaý maqsatynda taǵaiyndaǵan bolatyn. Grant aiasynda 63 adam óz jobasyn Qazaqstanda ǵana emes shetelde de túrli salalarda tabysty júzege asyrýda.
Ministr Aida Balaeva saltanatty rásimge qatysýshylardy quttyqtady.
– Biz úlken ózgerister dáýirinde ómir súrýdemiz. Jastarǵa durys tańdaý jasaý, senimge laiyq azamat bolý, ózin-ózi damytý, oqý jáne eńbek arqyly tabysqa umtylý siiaqty eń mańyzdy jaýapkershilik júktelgen.
Memleket basshysy Qasym-Jomart Toqaev jastardyń damýyna, olarǵa jańa jáne aýqymdy múmkindikter ashýǵa erekshe kóńil bóledi. Bar úmitimiz – eńbek pen bilimniń jolymen júretin, adamdyq qadir-qasiettiń mánin tereń túsinetin, ata-baba dástúrin qasterleitin jastarda.
Biyl konkýrsqa qatysý úshin 5 baǵyt boiynsha 3000-nan astam ótinim tústi. Olardyń qatarynda Qazaqstannyń mádeni murasyn nasihattaýǵa, halyqtyq mádeni dástúrler men ónerdi ilgeriletýge, IT salasyndaǵy ǵylymi zertteýlerdi, startaptar men jobalardy, ekonomikanyń negizgi sektorlaryndaǵy kreativti biznes ideialardy iske asyrýǵa baǵyttalǵan jobalar bar.
Elimizde 1992 jyldan bastap dástúrli túrde ǵylymi, shyǵarmashylyq, kreativti qyzmetpen ainalysatyn, sondai-aq sport salasynda jetistikteri bar jastarǵa "Daryn" memlekettik jastar syilyǵy beriledi. Sonymen qatar qazaqstandyq jas jazýshylar men aqyndar Prezidenttik arnaýly ádebi syilyqtyń iegeri atansa, daryndy ǵalymdar D.A. Qonaev atyndaǵy syilyqtar men ǵylymi stipendiialar alady.
