سالتاناتتى شاراعا ق ر مادەنيەت جانە اقپارات ءمينيسترى ايدا بالايەۆا، پارلامەنت ءماجىلىسىنىڭ دەپۋتاتتارى، ق ر پرەزيدەنتى جانىنداعى جاستار ساياساتى كەڭەسىنىڭ وكىلدەرى، مەملەكەت جانە قوعام قايراتكەرلەرى قاتىستى.
ايتا كەتەيىك، مەملەكەت باسشىسى 2021 جىلى «تاۋەلسىزدىك ۇرپاقتارى» گرانتىن جاس قازاقستاندىقتاردىڭ جاڭا جانە قولدانىستاعى باستامالارىن قولداۋ ماقساتىندا تاعايىنداعان بولاتىن. گرانت اياسىندا 63 ادام ءوز جوباسىن قازاقستاندا عانا ەمەس شەتەلدە دە ءتۇرلى سالالاردا تابىستى جۇزەگە اسىرۋدا.
مينيستر ايدا بالايەۆا سالتاناتتى راسىمگە قاتىسۋشىلاردى قۇتتىقتادى.
– ءبىز ۇلكەن وزگەرىستەر داۋىرىندە ءومىر سۇرۋدەمىز. جاستارعا دۇرىس تاڭداۋ جاساۋ، سەنىمگە لايىق ازامات بولۋ، ءوزىن-وزى دامىتۋ، وقۋ جانە ەڭبەك ارقىلى تابىسقا ۇمتىلۋ سياقتى ەڭ ماڭىزدى جاۋاپكەرشىلىك جۇكتەلگەن.
مەملەكەت باسشىسى قاسىم-جومارت توقايەۆ جاستاردىڭ دامۋىنا، ولارعا جاڭا جانە اۋقىمدى مۇمكىندىكتەر اشۋعا ەرەكشە كوڭىل بولەدى. بار ءۇمىتىمىز – ەڭبەك پەن ءبىلىمنىڭ جولىمەن جۇرەتىن، ادامدىق قادىر-قاسيەتتىڭ ءمانىن تەرەڭ تۇسىنەتىن، اتا-بابا ءداستۇرىن قاستەرلەيتىن جاستاردا.
![](/uploads/images/20240127142910827.jpg)
بيىل كونكۋرسقا قاتىسۋ ءۇشىن 5 باعىت بويىنشا 3000-نان استام ءوتىنىم ءتۇستى. ولاردىڭ قاتارىندا قازاقستاننىڭ مادەني مۇراسىن ناسيحاتتاۋعا، حالىقتىق مادەني داستۇرلەر مەن ونەردى ىلگەرىلەتۋگە، IT سالاسىنداعى عىلىمي زەرتتەۋلەردى، ستارتاپتار مەن جوبالاردى، ەكونوميكانىڭ نەگىزگى سەكتورلارىنداعى كرەاتيۆتى بيزنەس يدەيالاردى ىسكە اسىرۋعا باعىتتالعان جوبالار بار.
ەلىمىزدە 1992 جىلدان باستاپ ءداستۇرلى تۇردە عىلىمي، شىعارماشىلىق، كرەاتيۆتى قىزمەتپەن اينالىساتىن، سونداي-اق سپورت سالاسىندا جەتىستىكتەرى بار جاستارعا "دارىن" مەملەكەتتىك جاستار سىيلىعى بەرىلەدى. سونىمەن قاتار قازاقستاندىق جاس جازۋشىلار مەن اقىندار پرەزيدەنتتىك ارناۋلى ادەبي سىيلىقتىڭ يەگەرى اتانسا، دارىندى عالىمدار د.ا. قونايەۆ اتىنداعى سىيلىقتار مەن عىلىمي ستيپەنديالار الادى.