Sharanyń maqsaty – Elbasy N.Á.Nazarbaevtyń álemdik deńgeıdegi qaıratkerligin, qoǵamdyq-saıası qyzmeti men eńbekterin keńinen nasıhattaý, jastardyń otanshyldyq sezimin damytý.
Konferensıanyń ashylý saltanatynda sóz sóılegen qala ákiminiń orynbasary Baqtıar Máken elordanyń qalyptasýyndaǵy Elbasynyń róli jaıly baıan etti.
– QR Tuńǵysh Prezıdenti, Elbasy elimizdiń táýelsizdigin qalyptastyrǵan tulǵa. Elbasy negizin qalaǵan ishki jáne syrtqy saıasatttyń nátıjesinde bizdiń jas memleketimiz ekonomıkalyq turǵydan damyp, halyqtyń áleýmettik ál-aýqaty artty.
Nursultan Ábishulynyń saıası erik jigeriniń arqasynda elordamyz sonaý Almaty qalasynan arqaǵa kóshirildi. Búginde bas qalamyz tek sáýletimen ǵana emes dáýletimen de tanyldy. Elordamyzdyń dúnıejúzine tanymal bolýyna Elbasymyzdyń qosqan úlesi zor. Elbasyny elordamyzdyń arhıtektory dep aıtamyz.
Onyń bastamalarynyń nátıjesinde elordamyzdyń iri halyqaralyq saıası-ekonomıkalyq, sporttyq, rýhanı sharalardyń ortalyǵyna aınaldy. Sondaı-aq, álemdik tatýlyq pen birlikti nasıhattaıtyn qala boldy, – dedi Baqtıar Máken. Sonymen qatar, ol Elbasynyń qoldaýymen ótken Jastar jylynda el astanasy jastardyń qalasyna aınalǵanyn tilge tıek etti.
– Tuńǵysh Prezıdenttiń qoldaýymen ótken bıylǵy Jastar jyly el jastaryn jan-jaqty qoldaýǵa jańa múmkindikter ashty. Nur-Sultan qalasy jastardyń qalasyna aınaldy. Oǵan dálel ýnıversıtetter sany 7-den 16-ǵa deıin kóbeıse, onda bilim alýshylar sany 62 myńnan asty. Al orta bilim beretin mektepter sany 39-dan 117-ke deıin jetti, – dedi qala ákiminiń orynbasary.
Sondaı-aq, konferensıada L. N. Gýmılev atyndaǵy Eýrazıa ulttyq ýnıversıtetiniń rektory Erlan Sydyqov sóz sóıledi. Ol is-sharanyń Nursultan Nazarbaev negizin qalaǵan joǵary oqý ornynda ótkendigin erekshe atap ótti. Ǵylymı-praktıkalyq konferensıa alańynda memlekettik qurylymdardyń ókilderi, qoǵam qaıratkerleri, ǵalymdar, qalalyq máslıhat jáne Qazaqstan Respýblıkasy Parlamentiniń depýtattary Elbasynyń saıası jáne shyǵarmashylyq jolyn, sondaı-aq el jastarynyń róli men bolashaǵyn talqylady. Sonymen qatar, QR Prezıdentiniń ataýly shákirtaqysynyń ıegerleri Qazaqstandaǵy saıası jáne zıatkerlik sabaqtastyq týraly erkin pikir bildirdi.
