Qarjy naryǵyn retteý jáne damytý agenttigi bankterge arnalǵan táýekelderdi basqarý jáne ishki baqylaý júıesin qalyptastyrý erejelerine túzetýler engizdi. Agenttik qaýlysy tıisti ózgeristermen tolyqtyryldy, dep habarlaıdy Dalanews.kz.
"Tutynýshy-jeke tulǵalardyń quqyqtary men múddelerin saqtaý maqsatynda bankter qorǵanystyń birinshi jelisin quraıtyn banktiń qurylymdyq bólimsheleriniń qandaı da bir qyzmetterine táýelsiz bólimsheniń bolýyn qamtamasyz etedi", delingen qujatta.
Jańa bólimsheniń fýnksıalaryna mynalar kiredi:
- banktiń qyzmetkerleri men ýákiletti agentteriniń qarjy ónimderin satyp alýdy júrgizý jolymen bank saıasaty men rásimderin saqtaýyna qatysty monıtorıń júrgizý;
- jeke tulǵalardyń bereshegin retteý boıynsha kredıttik sheshimder qabyldaýdyń ishki tártibin kelisý;
- qarjy ónimderiniń sharttaryn kelisý kezinde tutynýshylar tarapynan táýekelderdi taldaý; banktiń qarjylyq ónimderin jyljytý jáne jarnamalaý tájirıbesin taldaý.
Sondaı-aq EDB-niń jańa bólimsheleri ótinishterdi qaraýdyń tıimdiligin, klıentter úshin negizgi táýekelderdi, qyzmet kórsetý sapasy men qarjy ónimderin baǵalaýdy júrgizedi. Sonymen qatar olar ýákiletti bank organdaryn kredıtteýdiń kemshilikteri týraly habardar etýge, sondaı-aq bank ombýdsmanynyń sheshimderiniń oryndalýyna monıtorıń júrgizýge mindetti.
QNRDA-nyń tıisti qaýlysy resmı jarıalanǵannan keıin 10 kúntizbelik kúnnen keıin (2025 jylǵy 5 tamyz) qoldanysqa engiziledi.
Buǵan deıin bankterge óz janynan tutynýshy quqyǵyn qorǵaıtyn bólim ashý mindettelgeli jatqanyn jazǵanbyz.
