Prezident Qasym-Jomart Toqaevtyń pikirinshe, ekonomikalyq ósimdi qamtamasyz etý úshin tek memlekettik qarjy jetkiliksiz. Bul úderiske bank sektory da belsendi qatysýy qajet, dep habarlaidy Dalanews.kz.
“Úkimet kredit mólsherlemesin sýbsidiialaý arqyly bank qarjysyn tartý týraly bastama kóterdi. Qarjy sektory osy mindetti oryndaýǵa belsendi qatysýǵa tiis. Úkimet Kepildik qoryn qurý máselesin pysyqtap jatyr. Budan bólek, Biryńǵai jinaqtaýshy zeinetaqy qorynan "uzaq merzimge beriletin" qarjy tartylady. Bul – jetkiliksiz. Naqty sektordy kreditteý kólemin arttyrý úshin basqa da usynystar qajet.
Men Úkimet otyrysynda Ulttyq qor el ekonomikasynyń bir bólshegi ekenin aittym. Keibir sholýshylar, qoǵam qairatkerleri Úkimettiń Ulttyq qordan jii ári kóp qarjy alatynyn aitady. Bul – qalyptasqan ahýalǵa bailanysty qabyldanǵan sheshim. Osyǵan bola "daǵdarysqa tap boldyq" dep baibalam salatyndai sebep kórip turǵan joqpyn. Qordy ne úshin qurdyq? Qor qarjysy memlekettik mańyzy bar mindetterden ózge maqsatqa jumsalyp jatsa bir jón. Sondyqtan taǵy da qaitalap aitamyn, bankter bizneske kómektesip, ekonomikanyń damýyna qarjy salýǵa tiis.
Degenmen retteýshilik sharalardyń qatańdaǵanyna qaramastan, tutynýshylyq nesie kólemi burynǵydai ósip keledi. Ótken jyly atalǵan kórsetkish 33 paiyzǵa ulǵaidy. Al problemalyq boryshkerlerdiń sany 1,5 million adamnan asty. Qaryzǵa belshesinen batqan azamattarǵa kómektesý kerek. Bul – asa ózekti saiasi másele. Sonymen qatar qarjylyq saýatty arttyrý, ásirese óskeleń urpaqtyń osy baǵyttaǵy bilimin jetildirý mańyzdy. Osy rette bankter problemalyq zaimdardy qaita qarjylandyrý jumystaryn kúsheitip, boryshkerlerdiń sanyn ósirýge jol bermegeni jón. Azamattarǵa alaiaqtyq jolmen rásimdelgen kreditterge airyqsha mán berý qajet”, – dedi Memleket basshysy.
