“Bank TsentrKredit” AQ Qazaqstannyń bank sektorynyń qarjylyq turaqtylyǵyn arttyrý baǵdarlamasy aiasynda memleketten alǵan qarjylai qoldaýdy tolyq kólemde jáne merziminen buryn qaitarǵanyn jetkizdi, dep habarlaidy dalanews.kz.
Banktiń Dalanews.kz redaktsiiasynyń resmi saýalyna bergen jaýabyna sáikes, qarjy uiymy 2017 jyly memleketten 60 mlrd teńge kóleminde qoldaý alǵan. Bastapqy kelisim boiynsha bul qarajatty 2032 jyldyń qarasha aiyna deiin qaitarý kózdelgen.
“Bank TsentrKredit“ AQ Qazaqstannyń bank sektorynyń qarjylyq turaqtylyǵyn arttyrý baǵdarlamasy aiasynda memleket aldyndaǵy bereshegin 2025 jyly tolyq ótedi. Bank 2017 jyly memleketten 60 mlrd teńge kóleminde qoldaýǵa ie boldy. Alaida bul qarajat kelisimde kózdelgen merzimnen buryn tolyq qaitaryldy”, – delingen banktiń redaktsiia saýalyna bergen jaýabynda.
Bank memleket aldyndaǵy mindettemesin úsh kezeńmen oryndaǵan. Atap aitqanda, 2024 jyldyń jeltoqsanynda – 20 mlrd teńge, 2025 jyldyń sáýirinde – 10 mlrd teńge, al qalǵan 30 mlrd teńge 2025 jylǵy 11 tamyzda qaitarylǵan.
Osylaisha, “Bank TsentrKredit” memlekettik qoldaý aiasynda alǵan 60 mlrd teńgeni 2025 jyly tolyq qaitaryp, memleket aldyndaǵy bereshegin merziminen buryn japqan.
Aita keteiik, buǵan deiin Qarjy naryǵyn retteý jáne damytý agenttigi memlekettik qoldaý alǵan bankterdiń memleket aldyndaǵy mindettemelerin oryndaý tártibine ózgerister engizýdi usynǵan bolatyn. Jobaǵa sáikes, memleketten alynǵan qarajatty qaitarý jónindegi negizgi talap saqtalady. Alaida qaitarylatyn somaǵa bailanysty tólem merzimin 3 aidan 12 nemese 18 aiǵa deiin uzartý kózdelgen. Qazirgi ýaqytta bul túzetýler qoǵamdyq talqylaýdan ótip jatyr.
